ESU mtayable turgomo calu Sayfo bu athro d’Swisra
U Huyodo Suroyo d’Urifi ESU u ferco d’Swisra, mtayable turgomo bu yawmo şatonoyo du Sayfo dan 1915, bu hudro Suroyo Azex Gebesdorf d’Swisra.
Bu turgomano cam gabe di rişonitho zawgoyto d’ESU Ayfer Gabriel, Xuroyo Karim Asmar, u rişono du hudro İbrahim Sagur b’Ilme di cito d’Mor Abrahım Zuher Behnan wi mafqonitho du film d’Nun Aida Şalfer sımlın mamle bhaq du yawmano.
U turgomano dımtayıb bu hudro d’Suroyo Azex, mşarele b’qatinto d’şetqo cali ruho da sohde du cameydan u bıthır a malone kull ha bı dawre, mahkele cali ulsoyutho du Sayfo.
Imqadmonitho du turgomo Simona Qaduro huwla darbo li rişonitho zawgoyto d’ESU Ayfer Gabriel, dmahkela cali ulsoyutho du duxrono du Sayfo u bebzabno kalyo calu tuyobo da hfitwotho dgımisomi ba duxrone du Sayfo.
Xuroyo Karim Asmar huwle i hzaytayde xıd kohno di cito Suryoyto mıqa ulsoyoyo u duxrono du Sayfo dmid fusqono acle dhowe yawmo dilonoyo lu cameydan. Aida Şlafer dkıtyo i mafqonitho du film dcalu Sayfo d’ışme NUN, mahkela cali ulsoyutho dmıfrıs filme calu qtolğenso leşan dmitaşmıc lu ray dıbritho. Zuher Behnanste mqadamle mamlo cal ışme di cito d’Mor Abrohom d’Swisra.
Bıthır ma mamle dsimi, i gudo da şamoşe maşmaclın qole u zmaryotho la hadire du turgomano dhadırle mathlone d’şutose demqratoye uda came xıd Kurdoye u Turkoye uğer. Bu turgomo a mdabrone mawtawolın ha ma nubğe du Sayfo dkıtwe camo Hanna Gırco xıd remzo du Sayfo.