11/02/2021

ESU sımle qroyto la gabe Hollandoye dsındi i rmoyto di şultonutho dmawdiyo bu Sayfo

U Huyodo Suroyo d’Urifi-ESU, sımle qroyto la gabe Hollandoye kulle, dsundi i rmoyto dımqadmole mu gabo d’CU lu parlamento, leşan i şultonutho dmawdıyo bu Sayfo dsim calu camaydan, calan Armınoye ucala Pontusoye.

 ESU mırle; İ mawdyonutho di şultonutho bu Sayfo, gıdxulqo nihutho u snodo la camani dqudri dmanihi ruhaye u dnufqi mu tathirano dtrele u qtolğensano aclaye.

U Huyodo Suroyo d’Urifi-ESU frısle egartho, dıkmhane eba i rmoyto dımqadmo lu parlamento d’Hollanda, bnişo di şultonutho du athro’ste dmawdıyo bu qtolğenso dsımwola i mamlaxtho da Cuthmanoye uma caşıryotho da Kurdoye calu camaydan, calan Armınoye u Pontusoye. İ rmoytathe’ste, kmıntarwo dmıdroşo adyawma bu parlamento. ESU b’fsihutho mıstaqbele i rmoytathe dımqadmo mu gabo d’ChristenUnie dıkmirayşın me Joel Vordewind u dıkmısnodo mu parlamento, kmıtlıb mi şultonutho dkurho u qtolğensano dsim beyn dan 1915 uholan 1917.

Bi egarthathe ESU kımahke calu Sayfo dsim wi golutho du camo ma dukothathe a zabnoye u aydarbo jbiri dımşahlıfi i tawdithathe u mırle; İ mawdyonutho di şultonutho d’Hollanda ba hawbani, gıdxolıq nihutho beyn da camani ma çurhe camuqe dkıtte u dım’athrleste calu haqlathe u marduthoyo, momuno u kenşoyo. U bebzabno, i mawdyonuthathe dawse ulsoyto’yo, leşan mawdyonutho ruşmoyto u Emwothoyto.

ESU mawdacle’ste du mkono di mawdyonutho d’Hollanda ba hawbani, kothe bzabno da came şerşoye-Suryoye Othuroye, Armınoye uğer qalilotho b’Suriya kıcayşi cnufyo, qtolcamo, golutho me cayni hayle Turkoye-dsımwolın meqım 105 eşne u qtolğenso aclaye. İ mawdyonutho d’Hollanda bu Sayfo, egartho qrıhto’yo l’Turkiya cala hawbe dsımla bu dacbar wu ucdo u layba dımankıro i şrorutho-d’ğalabe athrawotho mawdelın bu qtolğensano.

Bu huthomo ESU dsımle qroyto la gabe d’Hollanda kulle dkıtne bu parlamento, d’sundi i rmoytathe d’CU u mırle; Kubcina dımmina li şultonutho d’Hollanda-drıfdo u tenkiro, u dmaqıblo u talabano di mawdyonutho. Bıthır me 100 eşne d’tenkiro me Turkiya uma muttafikayda, u camaydan heş kıcoyış trauma u calathe kobıc, dmote l’şlomo bi sbuthathe. ESU sımle’ste qroyto l’Turkiya dmıctarfo bu dacbarayda leşan a came kulle du athro, dqudri dhoyın b’awyutho camhıdode u mırle; Kiban d’şubqina, elo lıktocina!. Bu darğo qamoyo, kiba Turkiya dmaklıyo a hçomayda wu kboşayde cala dukotho di Mdabronutho yothoyto du garbyo udu madınho d’Suriya u dmklıyo u qtolcamo dıksaymi a muttafikayda.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…