ESU TURGOMO KTHOWO MAKTHABZABNO- VİZBADEN

U turgomano dsim athmıl bu salon di cito d’Mor Hadbşabo bi mditho d’Polhaim bu qlimo d’Gissen, mşarele b’qatinto d’şetqo cali ruho da sohde du camaydan.

Bıthır mqadım teşmışto ma tre kohne lahdo Aydin u Şemcun Qurqmaz dkıtwın hadire bu turgomano.

U mşalo du yulfono d’Urifi d’MUB Romel Mişel, bu mamlo du futoho dsımle mqadamle u qoyumo dmeqım bu parlamento dı Turkiya Tuma Çelik d’obe u turgomo.

Çelik bu mamlayde mahkele cali ulsoyutho d’camo dhiye dkothu u makthabzabno d’ruhe, ubebzabno kali cala nuqze di mhaydonutho du makthabzabno du camaydan dkıtne kthiwe bu kthowano dcalu makthabzabno.

U kthowano du makthabzabno sim bu leşono Turkoyo, Caraboyo w’ucdo fris bu leşono Almanoyo, ukito sabro dmıfrısı ste bu leşomo Englişoyo. U qoyumo Çelik mahkele cala şuşote şahine dkito bu athro u mırle “ulsoyoyo u camaydan bu zabnano dmahwe dkıtle talabe mhayde, ubebzabno dkıtyo hadiro dsoyım i mdabronutho d’ruhe”.

Bu huthomo du turgomo, Tuma Çelik mahkele cali ulsoyutho di lamme dmabdele u Mawtbo Umthoyo d’Bethnahrin u wahdo d’Urifi dkıtyo u sabro di mcadronutho da fulhone dıkmisomi ba wahde du athraydan d’Bethnahrin, u tlıble ma hadire dhowın sanode di kampanyathe.