Fabiola Lahdo qayıthla u şukono di malfonutho

Claymtho mu camaydan d’Södertälje du Swed, mdaşno u şukono; u Malfono di Şato.

 U şukonano maslım mu Frosqolo du Yulfono-Utbildningsradion li malfonitho Fabiola Lahdo, bi gala da malfone dımtaybo froshezwo du Swed.

 İ gala şatonoyto da malfone dıkmisomo hani 5 eşne cal hıdode, friso ba yawmotho dı şafıcina bu froshezwo ruşmoyo du Swed camu mqadmono Mark Levengood. U slogan di galathe; U dactith kmıxlıq bıgawe du sedro bi madraştoyo, u nişayde dmitaqwın a malfoneyo.

U bi galathe kobıc u kenşo wa yolufe da madraşyotho dımşajci a malfone dhowın mathlo bu fulhono ulsoyo dıkmaşın. İ diloyto di gala dsimo adşatoste, dıhdo ma bnotho du camaydan qmırla u şukono qamoyo du Malfono hatho Towoyo.

Fabiola Lahdo dhani 3 eşne malfonitho du leşono Swedoyo u Englişoyoyo bi madraşto d’Blombackaskolan b’ Södertälje, qmırla u şukonano di şato da 2020. Bu nuholo dhiw bu şukonano dımqadım l’Lahdo mawdıc; dkıtla muhabtho dıkhuzyo u yolufo bu mede dkıtle, kımqadmo b’hubo ubi iqoro lu yolufo.

Hol 33 alfo yolufe huwlın adşato u qolathe b’5 haqle frişe, leşan dmibayın u malfono towo di şato. Camgabe d’Fabiola Lahdo, mnaqe 4 malfone u malfonyotho hrene dğer madraşyotho dkıtne hedor Stockholm du Swed.