Farsufe mşamhe sımlın qroyto l’Biden dmawde bu qtolğenso da 1915

U rişono du gabo Lega Nord d’İtalya-Matteo Salvini mırle; İtalya lıklozım dfulğo tablitho cam Turkiya, hol dıkmankıro u qtolğenso dsim calan Armınoye bu zabno du qrobo qamoyo dbritho.

 Me gabo hreno, farsufe mşamhe b’Amerika dkıtne bu şerşo Armınoye, sımlın qroyto li şultonutho du rişono Joe Biden, dmawde bu qtolğenso dan 1915.

Gabe İtaloye’ste kımdawmi dmahwın u hfuxyathe mqabıl d’Turkiya bi sbuthathe du qtolğenso. U rişono du gabo yaminoyo Lega Nord Matteo Salvini dkıtyo bebzabno waziro di gawoyutho d’İtalya, krıhle u qedomo d’Turkiya u mırle; İtalya lıklozım dfulğo tablitho cam Turkiya, hol dıkmankıro u qtolğenso dan Armınoye. Layto mkono dmitabde dialog cam Turkiya, hol dlo mawdıyo bu qtolğenso.

Bu mamlo dsımle Salvini bu Senato xıd funoyo lu rişwazire Mario Draghi mırle; U rişwazire kobıc domure. Aydarbo kibox d’jubrıt u rejim Turkoyo dımahwe niye tawto. Klozım dmamtena lbolox, du rejimano lo belhude kırofıd a zedqe da neşe, elo kıdoyış’ste kull şıkıl d’şlomo u hathe kımankır i kinutho makthabzabnoyto. Lo tocina du athrano’yo dlıkmawde ban Armınoye ubu qtolğenso dsımle aclaye.

Bebzabno Kriss Jenner wa bnothayda Kim u Kourtney Kardashian dkıtne Amerikoye umu şerşo me Armenia, dkıtne mşamhe b’Amerika mıştawtaflın la qroyotho dıkmisomi bu athro, leşan i şultonutho du rişono Joe Biden dmawde adşato bu qtolğenso dan Armınoye.

Cami iqartho d’Kardashian, kito’ste u amnoro Armınoyo Serj Tankian, u musiqoro Eric Esrailian uğer Armınoye idice b’Amerika, dıksundi u talab du Mawtbo Athronoyo dan Armınoye b’Amerika, leşan i mawdyonutho du qtolğenso. Leşan i mawdyonutho bu qtolğenso dan 1915, mabde kampanya bi dafo du İnstagram dmahto bu ışmo; Ono kımawdeno bu qtolğenso dan Armınoye.