Farsufo mu cameydan qtil bu hbuşyo d’Suriya

Farsufo mu camaydan dımsıkwo bi şato da 2016 ma haylawotho du rejim d’Suriya, heş ucdo athi xabro li iqarthayde dmayıth bu zabno da buqore dsimiwo acme.

 Samir Kamel Xabbaze dıkmisım taxmin dıqtil bi netije da teşniqe dsimi bhaq dide ba hbuşye du rejim, i şladayde lımasılmo li iqarthayde dıkcayşo bi mditho d’Saydnaya hedor di erişkoyto dı Darımsuq.

 Farsufo hreno mu camaydan dıknofıl debho di barbroyutho da teşniqe dıksaymilın ahaylawotho di mşaynutho uda n’istixbarat bgawıd da hbuşye du rejim d’Suriya dkımrayşanle Başar Alasad.

Sniğro Mişel Şamal dkıtyo mu athro d’Suriya, bi maqırhonutho dıfrısle lumıhreno bi dafayde du Facebook, mawdacle da haylawotho di mşaynutho uda n’istixbarat d’Suriya, hulın xabro li iqartho d’Xabbaze dkıtyo mi cito Suryoyto Malkoyto du wabrathe Samir Kamel Xabbaze qtil, u mşadarlın i hiyoyuthayde li dayira di aykanoyutho farsufoyto du Nufus cam warqo dıkthiw acla du qtiloyo Samir mayıth mi celtho du kriz du lebo d’athileyo bu zabno da buqore dsimiwo acme.

Bebzabno, sniğro Şamal mawdacle di şlado d’Şamal lımasılmo li iqarthayde xıdwothe xıdwothıd d’casrowat olufe d’msikoye dıqtili bi netije da teşniqe dsimi bhaq dıthe ba hbuşye du rejim d’Alasad. Sniğro Şamal mawdacleste da haylawotho du rejim balhude hulın fsoso li iqartho d’Samir Xabbaze dmaqimi b’şıkıl ğnizo teşmışto cali ruhayde bi dayro d’Yuldath Aloho bi mditho d’Saydnaya hedor dı Darımsuq.

Samir Kamel Xabbaze dkıtyo farsufo mu camaydan di cito Suryoyto Malkoyto cımre 55 ışneyo, msıkwo ma haylawotho du rejim bi mditho d’Saydnaya i şato da 2016, cıl mıdkıtwe najoro ulatwole fulhono folitiqoyo.

Ba mowat hbişoye Mşihoye kito ucdo ba hbuşye du rejim d’Suriya, ukitoste hedor 2 alfo hrene mvaycene, ube bzabno msik rişone Mşihoye saqıbloye baynothaye u hawraydan Sacid Malke dkıtyo u tahlufo du gabo du Huyodo Suryoyo d’GHS dımsıkwo 12 bu yarho d’Ob i şato da 2013 bu bethtawso di mditho di Qamışli ma haylawotho du rejim d’Suriya. Umu zabnawo uhul ucdo mawdconutho layto cali ctiduthayde.