Fatıryarxo Al Raci thımle Hizballah dıkdoyuş cali şaryutho d’Lebnon

U fatıryarxo di cito Suryoyto Marounoyto Mor Bışara Butrus al Raci, thımle u gabo şica d’Lebnon Hizballah bu kriz rabo dkito adyawma bu athro. Calu thomano’ste, hawile u rişqutno Michel Aoun ytawto camu fatıryarxo al Raci.

 Elo u abro rabo du rişwazire catiqo d’Lebnon Rafiq al Hariri-Bahaa al Hariri, mawdacle u snodayde lu fatıryarxo u mırle; Lebnon klozım dnufqo mu krizano u dfayşo bi moruthayda.

U fatıryarxo di cito Suryoyto Marounoyto Mor Bışara Butrus al Raci thımle u gabo d’Hizballah bı aykanoyutho harıwto dkito ucdo b’Lebnon u mırle; U dawro dkıtle u gabano bi şultonutho d’Beyrut, dı qotıc i mcadronutho dkuthyo man athrawotho du macırbo uman athrawotho du Xaliç’yo. Hizballah klozım dmoyıd i mşalutho du kriz momunoyo dkito bu athro. Huwe’yo i celtho, du timo rabo dkobina adyawma.

A melani du fatıryarxo hiwi bi maqıblonutho dsımla i dafo du Vatikan acme u hathe kmifaşqo’ste dkıtyo inaqla qamayto d’al Raci bşıkıl qawyo u baroyo kısoyım Hizballah sturyo. Bebzabno u krizano dkıtyo qento li mşaynutho du athro, lawi xıdwothe mu zabno du qrobo gawoyo d’Lebnon.

Hathe da 2 naqlat’yo dıksoyım u fatıryarxo sturyo Hizballah-dıkmısnıd mu İran, u calathe tlıble u rişqutno Michel Aoun ytawto acame. Elo yawme d’Arbco bıthır mi ytawto dcamu rişqutno, al Raci dacırwo bu xabrayde u mawdacwole dfawdo fhımwo u mırwole; Hizballah, kısonıd Lebnon bkull haqlo.

Me gabo hreno, u abro rabo du rişwazire catiqo d’Lebnon Rafiq al Hariri; dı qtılwo bı hçomo ba 2005, mawdacle u snodayde lu fatıryarxo bi sbutho d’Hizballah. Bahaa al Hariri sımle u rişqutno sturyo u mırle; Lebnon klozım dmitaxlıso mu krizano dıkluqyo u dımhafdo naqla hreto cali moruthayda. Ahna kıtulbina i hirutho d’Lebnon mu kboşano u kıbcina dfayşo neutral. U fatıryarxo lıkobıc di aykanoyutho du athro dquşyo zıttır u ahna kısundina u darbo dıkmhalıx.