01/04/2021

Fatıryarxo Alraci mıstaqbele bu qentrunayde d’Bkırki u rişono du gabo d’USUP İbrahim Murad cam taşdarto folitiqoyto du gabo

İ qadişutho du fatıryarxo di cito Suryoyto Marunoyto Mor Bşara Bıtrıs Alraci mıstaqbele bu qentrunayde d’Bkırki, u rişono du gabo du Huyodo Suryoyo Tibeloyo İbrahim Murad cam taşdarto folitiqoyto du gabo.

Murad bi ytawtathe dımayadle a talabe du fatıryarxo Alraci, mawdacle’ste di wolitho di rişqutnutho d’Lebnon htifoyo mu gabo d’Hizballa du İran.

U rişono du gabo du Huyodo Suryoyo Tibeloyo d’USUP İbrahim Murad cam taşdarto mi mdabronutho du gabo, sımlın athmıl socurutho li qadişutho du fatıryarxo di cito Suryoyto Marunoyto Mor Bşara Bıtrıs Alraci bu qentrunayde dı Bkırki.

Bi ytawtathe dıdrişi eba a’şuşote haroye du kriz athronoyo d’Lebnon, Murad mawdacle du gabayde d’USUP kımayıd i xarita du darbo dımbaynole u moro dı Bkırki, u mathkarle ste du lumodo emwothoyo wi frişutho d’Lebnon ma krize qlimoye kımmathli talabe athronoye şarire, u mırle “i fatıryarxutho dı Bkırki wi qadişutho d’Mor Bşara Alraci kımmathli i rişonutho athronoyto u tawdithoyto şarirto da Lebnonoye kulle. Bkırki aminoyith gıdfayşo u asas rişoyo d’Lebnon kul dıkloqe qente u casqıwotho. İ wolitho di rişqutnutho d’Lebnon htıftoyo mu gabo d’Hizballa umu İran, wu sistem federaloyo kımmathıl u şroyo towo dkulle la qetre du dactid d’Lebnon udu nfoqo du moro la gawnayde a’mşahılfe”.

Camgabıdathe, Murad mahkele li qadişuthayde cala fulhone dıksamlın u Mawtbo Umthoyo d’Bethnahrin d’MUB ba gabyade kulle dkıtne hfite b’Urifi ub’Amerika ubı Bethnahrin, u mawdacle da mathlone d’MUB ba ytawyotho dkowelın ba platforme emwothoye ktılbi kul naqla dmisım u huroro d’Lebnon udmitadcarle i moruthayde, uba melani mdawamle “u şroyo du kriz d’Lebnon latyo bu tuyobo d’guboye msarhıbe du parlamento, uloste bu şekolo d’şultonutho kbışyo mu gabo d’Hizballa umu gbino du fasad. U camo d’Lebnon lıffayış kibe dıtocın zıd mawxa, umi celtho du kafno hın mu camo kmıtfoki li golutho, u hın ste lafu intihar. U athro d’Lebnon latyo faqiro, elo u krizayde mi celtho du gnowo udu tenhibo dkowe mu grub da rişone du fasad”.

Murad bıthır mi ytawtayde camu fatıryarxo Alraci, mawdacle du gabayde d’USUP lo balhude ktolıb dmitayıb lumodo emwothoyo laşan d’Lebnon, elo kımakıd ste calu fusqono d’Emwotho Mhaydotho da na’1559 dıklozım dmitafıt la haye. Murad makadle ste dıklozım dmişatıs gbino athronoyo foruqo d’Lebnon, bnişo dmitahwe funoyo la sohde dbızlın admaye laşan i morutho d’Lebnon wi şaryuthayde.

Check Also

U gayso Athronoyo d’Suriya dıkmısnıd me Turkiya msıkle bu yarho d’İlul d’şafıcina hol 52 farsufe

U tukoso da zedqe noşoye leşan i şrorutho wi kinutho da Suriye, frısle taşroro calu mınyon…