Fatıryarxo di cito Catıqto d’Madınho Mor Gewargis mıstaqbele taşdarto ma mdabrone u tagore du camaydan bı Meşigen

CIRAQ – İ qadişutho du fatıryarxo di cito Catıqto d’Madınho bu Ciraq ubıbritho Mor Gewargis Tlithoyo Yunan, mıstaqbele taşdarto ma mdabrone du camaydan u Kaldoyo-Suryoyo-Othuroyo dıkhoye b’Amerika. İ taşdarto mrayşınole u rişono di qelayto di tagorutho Kaldoyto Amerikoyto Marten Manna dkıtyo bebzabno u rişono du şutoso Kaldoyo bı Meşigen u acme ste u rişono di qelayto di tagorutho Othuroyto b’Şekago Robert Deqlita. 

İ taşdartathe ste kmişaklowa ma tre morıd da şuğlone rabe b’Amerika Yacqub Baqqal u Kristofer Dina, u mdabrono du makıthbo du şutoso Kaldoyo bu Ciraq Ğazwan Alyas, u mcadronayde Hanan Qayya wu mşalo du tboco froso Wilson Sarkis. 

Bi ytawtathe, mbayn da sebwotho frişe dıdrişi kıtwo i aykanoyutho du camaydan bu Ciraq wa darbone du snodayde, wa fulhone dıkmisomi bnişo dmitaqwın a’tarmiyotho du quyomo momunoyo b’gawıd du athro du Ciraq, bnişo dmıxlıq gade du fulhono laşan du yuthrono du camaydan udu kenşo Ciraqoyo gawonoyith. 

Li ytawtathe mıştawtafle ste u efetrufo fatıryarxoyo Mor Yacqub Daniel dkıtyo bebzabno u hasyo di marcitho d’Boğdod ud’Albasra du Ciraq wu notarrozo fatıryarxoyo qaşişo Şamcun Aslan.