Fatıryarxo Mor Luwis Rofael Qadmoyo Sako, mqadamle rmoyto li şultonutho d’Boğdod dıktolıb eba dhowe u quwolo calu kontenjan da Mşihoye bu parlamento du Ciraq masro b’dosya dilonoyto da mgabyone du camaydan

BOGDOD – I rmoytathe dımqadmole fatıryarxo Luwis Sako athyo luhwoyo bu buyono dıfrısle bu calway “qroyto di cito Kaldoyto bi cohnutho dımqarawlın a’guboye gawonoye du parlamento”. Bi buyonayde, Mor Luwis Sako kmawdıc dbalhude fayış kmo yarhe lu zedqo dkıtle kul barmothoyo Ciraqoyo dızzeyo lu sanduqo da guboye, udımnaqe u farsufo dkımmathele. 

Bebzabno, i qadişuthayde mlabable a’barmothoye kulle dilonoyith a’Mşihoye dımhathıthi i dosyaththe da guboye, udmawfıqi fetqo di mgabyonutho laşan dqıdri d’obın qolaye, u makadle ste da Mşihoye Ciraqoye şerşoyene b’gawıd du athro du Ciraq, u masrene cami hiyoyuthaththe hatta hani dımgalwelın ste mu athro, udımqadamlın lu Ciraq dbihuthnafşo rabtho. 

U fatıryarxo di cito Kaldoyto mawdacle ste di mathlonutho da Mşihoye ducdo bu parlamento du Ciraq fawdoyo, u mırle “krıfdina dhowina benzin dıkyoqıd laşan da yuthrone du haylano udu hreno, ubu şıklano ktolabno ma Şica, ma Sunna uma Kurdoye bi şultonutho qentrunoyto d’Boğdod, dımcadrilan laşan dmadıcrina i mathlonuthaydan, a’zedqaydan wu dawro dkıtlan bu Ciraq”. 

Callathe, fatıryarxo Sako mqadamle rmoyto li şultonutho d’Boğdod dhowe u quwolo dcala kursiye du kontenjan da Mşihoye masro b’dosya dilonoyto da mgabyone du camaydan, laşan dımnaqın u farsufo dıkmıtyaqni dkibe dımşabıl u athraththe udımgaşım qolaye b’gawıd du parlamento. 

U kontenjan dımbayın la Mşihoye bu parlamento du Ciraq kmişakıl m’hamşo kursiye da qoyume. 

Meqım mathe ste, a’hamşo gabe u tukose folitiqoye du camaydan dkıtne hadome bu koalisyon d’Athra, mqadamwolın talab li şultonutho du Ciraq, dhowe u quwolo dcalu kontenjan da Mşihoye balhude masro cama n’abne du camo Kaldoyo Suryoyo Othuroyo, bnişo dmisım u garanti dhowele u camaydan mathlonutho şarirto ub’kinutho bu parlamento du Ciraq.