Fatıryarxo Sako hawile ytawto cam Mustafa Alkazimi

U fatıryarxo di cito Kaldoyto d’Bobıl Mor Luwis Rofayel Qadmoyo Sako, mawdacle dkito menyono celoyo ma nabne du camaydan dkıtne ba athrawotho şbobe u bi golutho, kıbci ucdo dı dıcri mehatho lu athro du Iraq.

Bi lqoyto dhawile camu rişwazire du Iraq Mustafa Alkazimi, Mor Luwis Sako mwasafle u qedomo jıddi dıkmahwiyole i şultonutho d’Boğdod li sbutho da Mşihoye.

U rişono du mawtbo da wazire du Iraq Mustafa Alkazimi, athmıl casriye mıstaqbele bu qentrunayde bı Boğdod, u fatıryarxo di cito Kaldoyto d’Bobıl Mor Luwis Rofayel Qadmoyo Sako cam taşdarto dıkmişaklo ma tıre hsayo Mor Basilyos Yaldo u Mor Robert Jırjis.

Sako bi ytawtathe grışle u zuhoro calu kuşoro dmahwele Alkazimi bu mahwo şqolo qriho dhawile cama sebwotho ulsoye du athro, u mahweleste dkıtle sabro dımdawım u qedomano di şultonutho d’Boğdod dıkmafıt anişe du camo la haye udkibe d’mamte şroye la casquwotho dıkloqelın u Iraq bu maşıqlano ducdo. Callathe, Sako mawdacle di cito Kaldoyto ksındo adawsat dkımhalaqlın Alkazimi bi sbutho di mşaynutho udi şalyutho du Iraq.

Bebzabno, fatıryarxo Sako mawdacle da Mşihoye krığşi ucdo bıthnihutho zıttır bu taro du qedomo jıddi dıkmahwiyole i şultonutho d’Alkazimi li sbutho da Mşihoye du Iraq, u grışleste u zuhoro cal menyono celoyo mu camaydan dıkhoye bi golutho dkobıc docır ucdo me hatho lu athro.

Me gabo hreno, Alkazimi mawdacle du Iraq u athro dkuleyo, wa Mşihoye anabne şerşoye du athrone, u layto furşono bayn da nabne dıha athro, u kulle şorikene bu bnoyo du dactid du Iraq.

Alkazimi mawdacleste du tarcayde ftihoyo la Iraqoye kule, wi şultonuthayde jıddiyo dımcadro amşihoye u dşıryo aqetrathe, u hawxa mdawamle “fsihoyena dıdıcri amşihoye lu Iraq, udmıştawtıfi lu bnoyayde. A Iraqoye ba mathhabathe kule lhiqoyene l’Iraq hatho dıkmawde bu şlomo u dıkrofıd u cnufyo”.