Fatıryarxo Sako hawile ytawto camu rişwazire Alkadhimi

U rişwazire du Iraq Mustafa Alkadhimi, mıstaqbele bu qusrayde bı Boğdod i qadişutho du fatıryarxo di cito Kaldoyto d’Bobıl Mor Luwis Rofayel Qadmoyo Sako.

Bi ytawtathe, dıdriş eba u tathir dıtrela i socurutho du papa lu Iraq, kleste cali sbutho du qonuno du bethdino wa diloyotho dkıtle u camaydan di daşto d’Ninwe.

İ qadişutho du fatıryarxo Luwis Sako, bu şuroyo da droşe dhawile camu rişwazire Alkadhimi, mqadamle a’tawdiyothayde li şultonutho du Iraq cala fulhone makışrone dsımla du qubolo du papa Mor Fransis, u mawdacle di socuruthathe maqwela i duktho dkıtle u Iraq b’gawıd du kenşo emwothoyo u mcadarla bu snodo da timoyotho di ciyeşe mşayanto udi şalyutho du athro. Bebzabno, fatıryarxo Sako mwasafle u insiyativ du diyalog athronoyo dmabdele Alkadhimi bnişo dmışre u kriz gawonoyo du Iraq b’şıkıl dıkmarde a’came mşahılfe dkıtle.

M’gabo hreno, Alkadhimi mahnele i fatıryarxutho Kaldoyto calu dawro dhawila ba hıdriyat di socurutho du papa, udıtrela dhuyo socurutho lu Iraq kulonoyith ulo balhude la Mşihoyayde. Alkadhimi mırle ste “u mathlo dkımqadmile farsufe xıdi qadişutho du papa wu rişono tawdithoyo da Şica Cali Alsistani kroşım laşaynayna u darbo du sabro lafu dactid, ukmaqwe a’timoyotho di mlahmonutho udi mşaynutho kenşoyto”.

Bıthır mathe, fatıryarxo Sako kali cali sbutho du qonuno hatho du bethdino du Ciraq wa fulhone dıkmisomi laşan dmibayın yadıcthone di tawditho Maşılmonitho b’gawıd di sictho da dayone, u mırle “u medano kmaqşe i tuhmonoyutho da mathhabe, wi Maşılmonutho latyo sniqoyto l’yadıcthone, wa dayone kıdci mınne a’kayle di Maşılmonutho. İ Maşılmonutho i tawditho du athroyo lfuth u nomuso esonoyo, ulatyo sistem aw rejim folitiqoyo”.

Camgabıdathe, fatıryarxo Sako grışle u zuhoro cali sbutho di bethsawbo d’Bağdede dıkmişdarla yolufe Maşılmone dlatne mi daşto d’Ninwe. İ qadişuthayde makadleste dıklozım dmitahwe iqoro la mdinotho Mşihoye du camaydan di daşto.