26/12/2020

Fatıryarxo Younan frısle egartho du ceyodo du cedo du mawlodo

Bi cohnutho du cedo du mawlodo d’Yeşuc Mşiho, u fatıryarxo di cito Suryoyto Qatholiqoyto Mor İğnatiyos Yusuf III Younan’ste, frısle egartho u mcayadle u camaydan wa Mşihoye hrene dıkmcaydi ba yawmothani u cedo zcuro.

 Bi egarthathe u fatıryarxo mbahasle cal sebwotho frişe xıd mathlo u kriz d’Lebnon, u qrobo gawoyo d’Suriya, i aykanoyutho du camaydan bu Iraq u ğer sebwotho hrene.

Bu şuroyo di egarthathe dıfrısle u fatıryarxo di cito Suryoyto Qatholiqoyto Mor İğnatiyos Yusuf III Younan, mcayadle a rişone da citotho ahwotho, a kohne, dayroye, şamoşe wu camaydan u mhaymno d’Lebnon, bu Madınho Mescoyo u tlıble hubo u şlomo bışme d’Mor Yeşuc Mşiho lkul farsufo bı britho.

Bi egarthathe u fatıryarxo mıdle mathle mu kıthowo qadişo bi cohnutho du cedano u kali calu kriz dkımdawım b’Lebnon wi casqutho dıkcayşi a bnaymothoye du athro bu haqlo folitiqoyo, momunoyo u kenşoyo wu husrono dıtrele u furqoco du lmino d’Beyrut calu camo. Camatheste kali calu pandemi di Corona u tathir dıtrele cali noşutho.

Cali sbutho d’Suriya, u fatıryarxo mawdacle di aykanoyutho du athro latyo frıştır me d’Lebnon, cal du cnufyo, da hjome u da taxtuşe kımdawmi cal dkito hayle nuxroye dıkmşadri zuze u zayne la ğrube u la marhıbone dkıtne bu qlimo. Cali sbutho du Iraq, u fatıryarxo mawdacle ifsihuthayde cali socurutho dgısoyım u Papa Mor Fransis lu athro u lı Bağdede bi daşto d’Ninve bu yarho d’Odor.

Bu huthomo u fatıryarxo mhanele u camaydan kule bu cedano du mawlodo u di rişe d’şato hathto da 2021 u mırle; Kımsaleno lu camaydan u Suryoyo mbarxo u la citothayde b’Lebnon, b’Suriya, bu Iraq, bu Xaliç, ban arcotho mqadşe, b’Yurdnon, Mısır, Turkiya, Urifi, Amerika u bı Australia u kıtolabno me Aloho dımbarıx aclayxu bu ışmo du Abo, du Abro udi Ruho hayo Qadışto Amen.