Fatıryarxo Younan laqi ahsaye da citotho mşahlıfe du cameydan di marcitho d’Arbil

İ qadişutho du fatıryarxo di cito Suryoyto Qatholiqoyto Mor İğnatiyos Yusıf III’yo Yunan, laqi b’Caynkawa bu Iraq, a hsayo rişone da citotho mşahılfe du camaydan di marcitho d’Arbil.

Bi ytawtathe dıdrişo eba i aykanoyutho du camaydan ban athrawothayde d’Bethnahrin, grişste u zuhoro cali ulsoyutho di hdoyutho udu fulhono maşwtıfo beyn da citotho ahwotho du camaydan kulle.

İ qadişutho du fatıryarxo Mor İğnatiyos Yusıf III Yunan, mıstaqbele yawme d’Tlotho dşaficina, a rişone da citotho mşahılfotho du camaydan di marcitho d’Arbil bu qentrun di hasyutho da Suryoye Qatholiqoye bi mditho d’Caynkawa. İ qadişuthayde laqi u hasyo di cito Suryoyto Orthodoksoyto Mor Niqodimos Dawud Matti Şaraf, u hasyo di cito Kaldoyto d’Bobel Mor Başar Matti Warda, u hasyo di cito d’Madınho d’Othuroye Mor Apres Yuxanna.

Li ytawtathe mıştawtafle’ste u mdabrono di bethsawbo d’Mor Afrem di Mcartho d’Saydnaya d’Suriya efetrufo fatıryarxoyo Mor Yahkub Babawi. A hsayo du camaydan mqadamlın tawdiyotho li qadişuthayde, cali socurutho şlihoyto dsımle lu Ciraq, u mwasaflın a fulhone dıksoyım bi mşablonutho di cito. A hsayo mawdaclın’ste dkıtte şubhoro dfulhi camıhdode u d’howelın methcadronutho, bnişo dmiqadım mşablonutho la mhaymne da citotho du camaydan b’Arbil.

Mxasra hreto, fatıryarxo Yunan mahwele i fsihuthayde cal dıkhoze i hdoyutho di ruho udu fulhono kmigaşmo beyn da hsayo ahunone di marcitho d’Arbil, u mawdacle da hsayo bu şıkılano kowın u mathlo towo lu qliros ula mhaymne bnişo dcayşi i hdoyutho camıhdode. Bebzabno, i qadişuthayde grışle u zuhoro calu dawro abohoyo da hsayo bi rocyutho da mhaymne cıl ma şartat casqe dıkloqın.

Camgabıdathe, fatıryarxo Yunan wa hsayo da citotho du camaydan d’Arbil, drışlın i aykanoyutho gawonoyto bu Iraq ubu qlimo du Madınho Mescoyo, ukalın cali sbutho di ithutho Mşihoyto wu dactidayda bu qlimo.