Fatıryarxo Yunan mawdacle a folitiqoye ktıcni i mşalutho dcali aykanoyutho mahişonitho d’Lebnon

İ qadişutho du fatıryarxo di cito Suryoyto Qatholiqoyto Mor İğnatiyos Yusıf III’yo Yunan, mawdacle da rişone Mşihoye d’Lebnon lıkşowın li wolitho dhulelınyo u camo, u ktıcni falqo rabo mi mşalutho dcali aykanoyutho mahişonitho d’Lebnon.

 Me gabo hreno, fatıryarxo Yunan mawdacle da Mşihoye d’Lebnon lo nafiqi moro lan ahunonaththe dımgalwelın man athrawotho şbobe.

 İ qadişutho du fatıryarxo di cito Suryoyto Qatholiqoyto Mor İğnatiyos Yusıf III’yo Yunan, athmıl mrayşanle u qerowo Alohoyo dımtayıb bi cito d’Alraciya b’Beyrut, bi cohnutho du duxrono du cedo da 2 sohde d’Mor Bhanma wi hothayde Sara. U fatıryarxo mırle; A mşale dıkmdacın dkıtne a rişone da Mşihoye d’Lebnon lıkşowın i wolitho dqayıthe mu camo. U knofıl aclaye mşalutho rabtho cali aykanoyutho mahişonitho dkito b’Lebnon bu haqlo momunoyo, folitiqoyo u kenşoyo. A Mşihoye kıtwolın dawro rabo bu bnoyo d’Lebnon u rabo, u huwolın debhe leşan dfoyış u athro şroğo di hirutho, elo camıhbol a Mşihoye latwolın hexamtho wi caşinutho dımdawmi dnufqi moro lu athrathe.

İ qadişuthayde dıgrışle u zuhoro cali ayknoyutho du Madınho Mescoyo mırle; Adyawma kşıfcina b’krize momunoye, kenşoye u folitiqoye. Kmathkırina a Mşihoye d’Suriya udu Iraq dtcınlın u dkımdawmi dtıcni haşe u casqtho xıd qalilotho nacime ban athrawothathe. Ahna kıtlan şubhoro da Mşihoye cıl ma haşe dhzelın fayişi masre cama waridathe b’gawe du athro. Ahna ba haye mcal fothe di marıhbonutho lıgtorina an athrawothaydan-Lebnon, Suriya, u Iraq, Yurdnon wan arcotho mqadşe. U nesyuno dıkcayşi a Mşihoye du madınho i golutho man athrawothathe dladici dsaymi u sutorathe’yo.

Camgabıdathe, fatıryarxo Yunan mawdacle da Mşihoye d’Lebnon, dıklozım dhowe qentrun la dhlimoye, ladici camıhbol dsaymi baytoyutho lan ahunonathe dmahzame man athrawotho şbobe, bnişo dcayşi b’Lebnon b’hirutho u b’neshono.