14/06/2021

Fatıryarxo Yunan sımle socurutho li mditho d’Alqaryatayn

İ qadişutho du fatıryarxo di cito Suryoyto Qatholiqoyto Mor İğnatiyos Yusıf Tlithoyo Yunan, sımle socurutho li mditho d’Alqaryatayn dkıtyo bi hiğmonutho d’Hımıs b’Suriya.

Bi socuruthathe, fatıryarxo Yunan karıx bi dayro d’Mor İlyan u mıdle mawdconutho cala fulhone du hethothayde.

İ qadişutho du fatıryarxo di cito Suryoyto Qatholiqoyto Mor İğnatiyos Yusıf Tlithoyo Yunan, cam taşdarto mi fatıryarxuthayde sımle lumıhreno socurutho li dayro d’İlyan dkıtyo bi mditho d’Alqaryatayn bi hiğmonutho d’Hımıs b’Suriya

Lu qubolo di qadişuthayde, mıştawtafle mşale mdinoye u folhoye, u menyono ma falohe di tahrazto du bnoyo u hethotho di dayro d’Mor İlyan baynothaye u mdabrono da fulhone ardixlo Cabbud Cabdıllatif. Bebzabno, mıştawtafle ste menyono d’kohne, dayroye u dayroyotho dkımşabli bi dayro d’Mor Musa Alhabaşi bi mditho d’Alnabık.

Bi socuruthayde, fatıryarxo Yunan karıx bi dayro d’Mor llyan ubi citayda, u maqımle slutho u teşmışto qum du qabro d’qadişo İlyan, u tlıble mene dmastır i dayro wi mditho d’Alqaryatayn dıkhoye eba sagiyutho mu camaydan.

Bıthır mathe, i qadişuthayde mıdle mawdconutho cala fulhone du hethotho di dayro uda n’arcotho d’hedore dkımdawmi ucdo, ubebzabno qayıthle mawdconutho cala dawsat dımhalqiwo meqım udımşawşatwolın i dayro d’Mor İlyan meqım mu tehriwayda ma grube marıhbone dı Dacış.

İ fatıryarxutho cami marcitho d’Hımıs, d’Hama ud’Alnabık di cito Suryoyto Qatholiqoyto, kfılhi camıhdode laşan dmisım u bnoyo u hethotho di dayro d’Mor İlyan, b mcadronutho da tanone du camaydan.

İ mditho d’Alqaryatayn dıkhoye eba sagiyutho mu camaydan, bu yarho d’Ob i şato da 2015 kbişowa mu tukoso marıhbono dı Dacış dıhtıfwole 230 farsufe, baynothaye 60 Mşihoye mu camaydan. Ubu yarho d’Odır i şato da 2016 sımwo u hurorayda ma haylawotho du rejim bu snodo du haylo oyaroyo d’Rusya.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…