Finland hadirtoyo dimdawmo u cboraytha lu NATO dlo mu Swed. Erdoğan komer du Swed tro lo notır snodo bi sbutho du dcborayda lu NATO

HELSINKI – Bi maqırhonutho dhuwwole u waziro di baroyutho d’Finland Pekka Haavisto meqım 2 şabe mırwole; U xtuto rişoyo d’Finland kull naqla hawi u d’cubrina lu huyodo du NATO camu Swed. Maslamlan i muraçacaydan lu NATO camhıdode u gıdhuthmina u maşıqlo’ste camhıdode-cal da 2 athrawotho kımşakli strateji folhoyo mşawtıfo.

Elo ucdo bıthır mıd m’watın a esore beyn du Swed u Turkiya, u waziro Haavisto mawdacle, dgımıçbori d’nufqi mu xtuto di muraçaca dsimo camhıdode dlu NATO, cal di muraçaca du Swed kımahwe dheş gıdgurşo zabno yarixo. U waziro mırle; Ucdo heş latlan niye dımdawmina ruhayna, elo kit bıthır mucdo d’dorşina a mkone me hatho.

Cali maqırhonuthathe d’Finland, hawile u waziro di baroyutho du Swed esore camu bar’amnayde Haavisto u tlıble fuşoqo mene. İ mwatyutho beyn Ankara u Stokholm zayido, dilonoyith bıthır mu celoqo di kalo d’Erdoğan uma tagliyotho dsimi ma Sicotho d’Rojava udu yaminoyo qaşyo Rasmus Paludan mawqadle u qurcano.

Cala tagliyothani dsimiwo, Finland mırwola; Kmıştacın bi mşaynutho da 2 athrawothaydan. Camathe’ste u rişqutno Turkoyo Erdoğan athmıl mırle; U Swed tro lo notır snodo me Turkiya bi sbutho du dcborayde lu NATO, bıthır mıd mawqıd u qurcan qum di rişizgaduthaydan b’Stokholm. En dlo mahwetu iqoro li haymonutho di qutnutho d’Turkiya da Maşılmone, lıkmotalxu u snodaydan lu cborathxu dlu NATO.