Fond Barnabas tlıble mawdyonutho bu Sayfo

U Fond d’Barnabas, sımle qroyto lu rişwazire d’Britania Boris Johnson, dmawde bu qtolğenso dsim calu camaydan, calan Armınoye u cala Yawonoye bu zabno du qrobo qamoyo dı britho.

U rişono du Fond d’Barnabas, mşadarle egartho lu rişwazire Britanoyo u tlıble mene ruşmoyith, dmıctarıf bu qtolğensano dsımwola i mamlaxtho da Cuthmanoye cala Mşihoye ban 1915.

U Fond d’Barnabas dımşataswo ban 1993 b’Britania leşan u snodo da citotho uda Mşihoye dıkmırdofi, mşadarle egartho lu rişwazire d’Britania Boris Johnson, leşan ruşmoyith dmawde bu qtolğensano dsımwola i mamlaxtho da Cuthmanoye calan Armınoye, Suryoye Othuroye u Yawnoye ban 1915.

U rişono gawonoyo du Fondano d’Barnabas dkıtyo u qentrunayde b’Britania-dr Patrick Sookhdeo, mşadarle i egartho lu rişwazire u tlıble mene dmawde da qatle baroye dsimiwo mqabıl da Mşihoye mi mamlaxtho da Cuthmanoye meqım 100 eşne-qtolğensano’we dhawiwo celtho lu qatlo dhol 3 milyone u750 alfo Mşihoye.

Bi egarthathe Sookhdeo mırle; U qtolğensano dan 1915 kmidıc kull naqla bu ışmo-u qtolğenso dan Armınoye-elo lo belhude qtılwo camo Armınoyo, qtılwo’ste mi qalilto da Suryoye Othuroye uma Yawnonoye. İ mawdyonutho bu qtolğenso dsim cala Mşihoye, gıdmcadro bu tekliyo du tuyobo d’qtolcame hrene bu dactith cala Mşihoye ubebzabno, i mawdyonutho u mede qonunoyo u kino dkibe dmisım’yo-lo lbelhude lan Armınoye, elo a dıbhe da Suryoye Othuroye u Yawnoyeyo’ste.

U rişono du Fondano grışle’ste u zuhoro calu babo du jıddo du rişwazire Ali Kemal dkıtwe gelyunoro Turkoyo dqtılwo ban 1922 cal dıkmifaşqwo saqıbloyo di mamlaxtho da Cuthmanoye. Bi egarthathe Sookhedo mahkele’ste aydarbo Turkiya mcadarla Azerbaijan bu qrobo d’Qarabax mqabıl dan Armınoye wu kboşo dsim cala dukothathe bu qlimo uda hçomani, kmifaşıq dkibın dhowın hawbe d’qtolğenso hatho calan Armınoye.