Surto: @Senat
09/02/2023

Frans mawdela bu Sayfo dsim calu camaydan

Athmıl, mhalaqla Fransa dawse hreto makthabzabnoyto bi sbutho du qtolğenso dan 1915. U senato d’Fransa, mawdele bi rmoyto dımqadmo leşan i mawdyonutho du Sayfo dsim calu camaydan ban 1915 mi mamlaxtho da Cuthmanoye. Bi rmoytathe dmaqıblo mi sagiyoyutho da senatore, mbayın 24 bu yarho d’Nison xıd yawmo du duxrono du qtolğensano.

09/02/2023

PARIS – Athmıl dkıtwe yawme d’Arbco-8 bu yarhano d’Şbot, sim quwolo dilonoyo bu senato d’Fransa. Bu knuşyano dsim bu senato, midowa i rmoyto dımqadmowala Valerie Boyer u Bruno Retailleau li ido. İ rmoyto’ste, frişowa calu Sayfo dsımwola i mamlaxtho da Cuthmanoye calu camaydan’wa beyn da eşne 1915-1918.

Bu quwolano dsim athmıl, i sagiyoyutho da 348 senatöre-awkith 300 m’ayade i rmoyto, 2 rfidolın wa hrene lo huwlın u qolathe. Bıthır mıd u senato maqbele i rmoytathe, maslıqo lu parlamento du athro ubu dawrayde u parlamento’ste maqbele dmoyıd i rmoytathe lu droşo. Elo heş lo mawdıc ema gıdmimodi i rmoytathe li ido.

Bi kthawto di rmoytathe’ste, camgabe dmaqbıl u mınyono dan abne du camaydan dqtiliwo bu zabno du Sayfo, mbayın’ste 24 bu yarho d’Nison yawmo du duxrono da Sohde Armınoye, Suryoye Othuroye Kaldoye. Ubu tarano, hathe hawyo inaqla qamayto’yo d’Fransa kımaydo i sbutho du Sayfo du camaydan li ido.

Bıthır’ste maczamle u şutoso d’Kaldo Aşur b’Fransa senatore, farsufe idice, şutose du camaydan; beynothaye ESU, gelyunore u ğer l’hşamto. U şutoso d’Kaldo Aşur hawile dawro rişoyo bu teqbilo di rmoytathe bu senato du athro u camathe’ste u Huyodo Suryoyo d’Urifi, ba esore diplomatiqoye dhawile hani eşne cama 2 mtaybone di rmoyto, maglele cali sbutho du Sayfo ucali mawdyonutho d’Fransa bu qtolğensano dsımwo calu camaydan ma Cuthmanoye.