Fransa gıdmaydo i rişonutho di wolitho du NATO bu Cıraq. Hathe inaqla qamayto’yo, dıkmaydo Fransa i mşalutho du NATO bu Cıraq

CIRAQ – İ wazirutho du sutoro du Cıraq mawdacla, d’Fransa gıdmaydo i mşalutho di wolitho du NATO bu Cıraq. U şuhlofano di mşalutho du NATO, gıdmşare bu yarhano d’İyor u hathe inaqla qamayto’yo, dıkmaydo Fransa hawxa mşalutho bu Cıraq.

U waziro di mşaynutho du Cıraq Thabıt Al Abbasi sımwole ba yawmotho dşafıcina socurutho dkmo yawme l’Fransa cami taşdarto folhoyto dkıtwo acme. Bi ytawto dhawiwole Al Abbasi camu bar’amnayde Sebastien Lecornu, drışwo şişaltho d’sebwotho u klewo dilonoyith cali aykanoyutho di mşaynutho du qlimo. 

Bi ytawtathe a 2 wazire kalınwo calu dawro du koalisyon Emwothoyo bu Cıraq, i mşalutho du NATO bu Cıraq-dilonoyith bıthır mıd Fransa gıdmaydo i wolitho du NATO. Camathe’ste a 2 gabe drışlın a esore dbeyn da 2 athrawotho bu haqlo di mşaynutho uğer. Bu qyomo dımde’ste, mawdıc d’Fransa gıdobo helikoptere la hayle oyaroye du Cıraq.

İ wolitho du NATO bu Cıraq mşarwola bu yarho d’Teşrin u qamoyo da 2018 calu talab d’Boğdod u kmişaklowa xıd mşawronutho la folhe Cıraqoye-awkith a hayle du NATO lo maydiwo duktho ba taxtuşe. Ucdo’ste Fransa gıdhayro calu terkiwo ucalu şuşoto da droşe folhoye leşan dhowın zıttır mawthrone bu qrobathe mqabıl d’Dacış.