Fris buyono me grub tukose mşahlıfe cala hjome d’Turkiya dıkseymo calu garbiyo du Iraq

Grub dı tukose mşahılfe mzaharlın mu qşoco du camaydan dıkmimıd nişo la hjome dıksaymolın Turkiya cala qastrat u qıryawotho Mşihoye bu garbiyo du Iraq.

 Bu buyono mşawtıfo dıfrıslın a’tukosani, sımlın qroyto msarhabto l’Emwotho Mhaydotho dnıfqo moro lu mede dfayış mu camaydan udkıtyo hul ucdo masro camu cafro da nabohothayde bu Iraq.

 Arbıco tukose Iraqoye u Urifoye mşahılfe frıslın buyono mşawtıfo cala hjome dıksaymolın Turkiya cala qastra u qıryawotho du camaydan dıknıfli cala thume bayn dı Turkiya wu garbiyo du Iraq. Bu buyonathe, a’tukosani mawdaclın di sagiyutho da fenyotho u qıryawotho dıkmisım hjome aclaye bu garbiyo du Iraq Mşihoyene, ubi netije da hjomani u camaydan dıkhoye bi qastra d’Zaxo, bi qastra d’Batifa ubi fnitho qaytoyto d’Şranş mgalwelın ma dukothathe, mi celtho da hjome oyaroye udi naşfe dıkmisomi aclaye. U buyono komır “a’comure d’33 qastrat u qıryawotho Mşihoye trelın a’botahthe u maftelın fothaye lafi mditho d’Nuhadra wa qıryawotho d’hedora. Wa haylawotho Turkoye bi dacwa du nfoqo mqabıl da mharbone di PKK kımdawmo ahjomayda abarbroye dhawın celtho du sxoro d’22 citotho bu garbiyo du Iraq. Ube bzabno atopat wa tayisyotho folhoye dı Turkiya mhelın athmıl soruhe b’arbac qıryawotho Mşihoye u ğer dkıtne calu thumo bayn Turkiya wu garbiyo du Iraq”.

Camgabıdathe, u buyono mşawtıfo mawdacle dı Turkiya lo balhude amharbone di PKK kmaydolın nişo la hjomayda, elo ba cuqobe dıksaymolın kmahweste qrihoyith dkıbco dfırso i Maşılmonutho tuxmonoyto bi fnithathe udmaydo asas l’ruha u ideoloji du grub da nahunone Maşılmone dkıtyo bi lohitho da tukose marıhbone. U buyono mırleste “i mdabronutho du rejim dı Turkiya kmawdiyo bu ideoloji da Ahunone Maşılmone wu texliyo di fnitho ma Mşihoye dilonoyith u mede dkowe b’Şranş u bğer qıryawotho hrene mathlo dıkmadıl calu nişo dkıtla Turkiyayo”.

Callathe, anarbıco tukose sımlın qroyto msarhabto l’Emwotho Mhaydotho, lu mawtbo di mşaynutho d’Emwotho Mhaydotho ulu Vatikan, dnıfqi moro lu mede dfayış mu camaydan u şerşoyo dkıtyo masro camu cafro da nabohothayde bu garbiyo du Iraq, u hawxa mdawamla “a’Mşihoye Iraqoye cıl ma hjome dsimi aclaye ma grube marıhbone dı Dacış heş kımdawmi dfayşi masre cama waridathe, elo Turkiya i kabışto kımdawmo ucdo u mede dsımwole Dacış, u kımnasyo dqışco a’Mşihoye aw dmıfqolın mu athro”. Bebzabno, u buyono tlıble mi şultonutho d’Boğdod udu qlimo d’Kurdistan du Iraq, dmaydi cal ruhaye i mşalutho di mşaynutho da came u tawdiyotho mşahılfe, u dımamno u sutoro da bnaymothoye Iraqoye dıkhoyın ba fenyotho dıknıfli cala thume du Iraq.

Anarbıco tukose dıfrıslın u buyono mşawtıfo hanine: i notarrozutho gawonoyto di sictho dkımdafco anabne da tawdiyotho uda mathhabe du Iraq, i notarrozutho gawonoyto du kunoşo Caraboyo laşan i zoxutho di sbutho Kurdoyto, u dawqo Şımroyo da zeqde noşoye wu inistitut Kurdoyo da buhone b’Hollanda.