Fris tebe hathe cali aykanoyutho di eqartho d’Diril

Bi sbutho di iqartho du cameydan dıhtifowa mi qritho d’Mahre d’Şırnaq fris tebe hathe bi sbuthathe dımqafın a msone du babo du kohno Hırmız Diril.

Me gabo hreno hın ma hadome di iqartho dı htifo ktıhmi u farsufo dkıtyo bi iqartho dkıtyo u ahilathe walaw hın mu tboco froso hulın ışmeste ahna laşan u şlomo di iqartho lıkmawdcina ışme du farsufo dıkmıthım.

Bi mawdconutho dmıdlan mi iqartho da htifoye di mnohto Şmuni Diril u Hırmız Diril dıkmıkrıx acle. U farsufo dkıtyo bi qritho dlı kımina ışme elo kiban dımminale A.D  ba buqore dsimi acme hule mawdconwotho mşahılfe bi sbuthathe mawxa hın ma hadome di iqartho ktıhmi hiye bu qatlo di mnohto Şmuni u buhtofo d’Hırmız Diril.

Me gabo hreno lfuth a mawdconwotho dı matilan mi iqartho mqafın amsone aşakalat d’Hermız Diril bgawe di qritho, u bebzabno mqafe yelak dılatyo heş idico dkıtyo tabıc dithe awlo.

Bi mawdconutho dkobe u abro di iqartho u kohno di citeydan i Kaldoyto Ramzi Diril komır amşale i jandarma lısımlın i wolithathe bi sbuthathe u lıkarixi xıdu mede dıklozım.

Me gabo hreno ha ma hadome di iqartho mawdacle dmeqım zabno uthimoyo marıswole buğre calu bayto di iqartho d’be Diril. U lfuth i mawdconutho dhule farsufo mi iqartho dıkhoye b’Fransa u htofo di iqartho latyo 1 bu yarho du ha elo meqımyo kmisım taxmin dkıtyo bayn 7 u 8 bu yarhano, metul bu mamlo dhawiwola i mnohto d’Şmuni Diril cami iqarthathe d’Fransa mırwola u farsufo A.D dkıtyo thimo mu taraf dhın ma hadome di iqartho  kıtle 3 hawrone side bi qritho. Mawxa iqartho kmıtyaqno a farsufani athın laşan isbuthathe.

U mede dınafıq li holo i sbuthathe gıdgurşo zabno metul da mşale qlimoye lıkowın mcawnone u lıkmaydi i sbuthathe jıddi li ido xıd mırwole u qoyumo du cameydan bu parlamento d’Turkiya Tuma Çelik bi rmoyto dımqadamwole u ba droşe dhawiwole cama mşalani.