Ftih dacwa cal Yonadam Yusuf Hanna bi sbutho du fasad

U bethdino di şafyutho du Iraq dıkhoyır cala sebwotho du fasad, thımle folitiqoyo mu camaydan dıkmadwo bidactho u bşıkıl lo qonunoyo zuze mu qlimo d’Kurdistan.

U rişono di lohitho d’Alrafidayn bu parlamento du Iraq qoyumo Yonadam Yusuf Kanna dkıtyo bebzabno u notarrozo du zawco demoqratoyo Othuroyo, hkim 3 yarhe hbuşyo, cal dıkmadwo ağro di mşawtbonutho mu qlimo d’Kurdistan camgabe du ağro dıkmitahwewole xıd qoyumo bu parlamento d’Boğdod.

 A dafe du nawlo du Iraq, frıslın surotho calu fusqono dmıdwole u bethdino da gunhe d’Alkarx dıkhoyır cala sebwotho du fasad bhaq du rişono du koalisyon d’Alrafidayn bu parlamento d’Boğdod qoyumo Yonadam Yusıf Kanna dkıtyo bebzabno u notarrozo du zawco demoqratoyo Othuroyo. U fusqonano dmid 26 bu yarho dı Tamız dşaficina, kmahke bırwihutho cali dacwa dımqadmole farsufo dışme Burhan Aldin İshaq bhaq du qoyumo Yonadam Kanna.

Lfuth i dacwa dımqadmo lu bethdino di şafyutho, Kanna kmıthım dıkmadwo tre ağre awkith mcaşe b’şıkıl lo qonunoyo, baynothaye ağro di maşwtbonutho dıkmadwole mi şultonutho du qlimo d’Kurdistan mu siqumo d’ha bu yarho dı Tamız di şato da 2005 uhulu siqumo d’28 bu yarho d’Şbot di şato da 2018 cal dkıtwe qoyumo catiqo bu parlamento d’Arbil, ubebzabno kmoyıd ağro hreno mcaş mu parlamento du Iraq cal dkıtyo ucdo qoyumo ebe. İ kmoyutho da n’ağre dqayıthle Kanna mi mdabronutho di mşawtbonutho gawonoyto d’Arbil, kmıtyo l’767 malyune u 927 alfo dinore Iraqoye awkith ışto malyune u 560 alfo dinore kul yarho. U camgabıdathe, i sictho du parlamento d’Boğdod dıkhayro calu fasad bu zabno dıtlıbla mu qoyumo Kanna mawdconutho cala mabuce da zuze farsufoye dkıtle lımathkarle eba u ağro di mşawtbonutho dıkqathleyo mu qlimo d’Kurdistan, mawxa ste u bethdino di şafyutho du Iraq thımle Kanna dlımaglele bidactho calu ağro dıkmadwole m şultonutho d’Arbil, u hkımle acle dmitahwele hbuşyo l’tlotho yarhe, elo u bethdino maklele u fusqonano l’tloth ışne cal d’Yonadam Kanna madcarle a’zuze du ağro di maşwtbonutho lu bank qentrunoyo du qlimo d’Kurdistan, u hule ste şudoyo dımcadıl u qedomayde.