Ftihi dukothe frişe dıbritho me hatho

Mu zabno dımşarele u virus d’Corona dmibarbız bı britho u dhowe qento la haye da bnaynoşo, ğalabe athrawotho fsıqwolın dısuxri a dukotho ruşmoye u kenşoye, bnişo dlo mibarbız u kewano.

 Elo ucdo, hın athrawotho maqımlın u fusqonano u ftıhlın a dukotho di slutho, hın dukotho da socure du turizm wu dukotho marduthoye.

 Hıdo ma dukotho dftiho adyawma la socure, i cito di Qyamto b’Urışlemyo dkıtwa hani 2 yarhe sxırto lu camo mcal fothe du virus d’Corona. I citathe dkıtyo bi şawtho catıqto d’Urışlem, macmırowa bi duktho d’slıwwo Mşiho u bıthır d’qayım me beyn da mithe.

Bu ftohano da tarce di cito adyawma, a mşale obanwo belhude aftho lkull 50 farsufe dcubri li cito u tlib menaye dfayşi rahuqe mehdode udlo mahti ido bılşi b’mede. İsroyel ftıhlaste hın madraşyotho, u Pazar uğer dukotho di slutho. B’İsroyel kito 16.700 farsufe kayiwe bi Corona u 279 mvayaclın a hayathe u 14 alfo nayıhlın mene.

Bebzabno u Fransa’ste maxıfla ışmo a tedbire u ftıhla a dukotho di slutho. Fransa meqım 10 şabe mahıtwola mnoco dmisale ba dukotho tawdithoye elo u bethdino makadle, du mnocano dmahıt cala citotho ucala masığde latyo qonunoyo. Camathe Fransa, kımhadro ruha lu maşıqlo trayono da guboye qlimoye dgımisomi bu yarho dıbqamuthayna.

B’Fransa kito 180 alfo dacwat di Corona u 28 alfo mvayaclın a hayathe. U rişono Amerikoyo Donald Trump’ste sımwole meqım kmo yawme mamlo u tlıbwole dmıftohi a citotho bu athro u makadwole calu dawro dkıtte a citotho ba haye da mdinoye. Turkiyaste ftıhla a dukotho di slutho; dilonoyith a masığde bu zabnano du cedo da Maşılmone.

U rişqutno du İran Hassan Rohani huwle amro dmıftohi a dukotho di slutho wa dukotho marduthoye. Bu İran mvayaclın 7.359 farsufe a hayathe. I duktho catıqto d’İtalya Paestum dkıtyo qarıwto l’Napoli ubi lohitho d’UNESCO, ftiho me hatho la socure wi bethcatiqotho du Vatikanste kıtla plan dfıtho naqla hreto a tarcayda.