Ğalabe athrawotho snıde i maqırhonutho d’Mısır mqabıl Turkiya

Kul dkothe, kıqoşe u ruğzo dibritho Caraboyto mqabıl du rişqutno d’Turkiya uda hjome dıksoyım u gaysayde calu garbyo du Iraq.

 U rişqutno d’Mısır Abdul Fattah al Sisiste, huwle amro lu gaysayde dhowe hadiro la cuqobe bıgawe du athro u larwal da thume du athro, leşan u duyoqo di mşaynutho athronoyto mqabıl da hjome dıksaymo Turkiya bu athro şbobo Libya.

U ruğzo beyn dan athrawotho Caraboye mqabıl d’Turkiya uda hjome dıksaymi cali morutho du Iraq, kul dkothe kıqoşe u kımawdici, du rişqutno Turkoyo kısoyım u reklam folhoyo d’ruhe bu garbyo du Iraq. Ankara kımdacyo dıkmıhyo ba cuqobani di naşfe udi hawa bu gerila di PKK dkıtyo bı dukotho frişe du garbyo du Iraq.

Elo a İmarat Caraboye Mhayde wi Scudiye, sımlın Turkiya sturyo cala hjomani dıksaymi camu İran cali morutho du Iraq. Anathrawothani mqadamlınste u snodathe l’Boğdod leşan dmaydo tedbire u dımhafdo cali morutho ucali mşaynuthayda. A hfuxyani dan athrawotho Caraboye, mqabıl di mudaxala d’Turkiya l’Libyaste.

Anathrawothani Caraboye, Amerika uğer athrawotho du macırbo mawdaclın u snodathe lu rişqutno d’Mısır Abdul Fattah al Sisi uli maqırhonutho dhuwle cala hjomani d’Turkiya bu athro şbobo d’Libya. Al Sisi makadle, d’Mısır kıtla zedqo dımdafco i mşaynuthayda u sımla qroyto dmitaklıyo i mudaxala gawoyto dıkmisomi l’Libya.

Bi maqırhonutho dhuwle u rişqutno al Sisi mawdacle, dkıtne hadire dımdaxli bu athro şbobo d’Libya, mqabıl di ithutho folhoyto d’Turkiya u huwle amro lu gaysayde, dhowe hadiro la cuqobe bıgawe du athro u larwal da thume du athro, leşan u duyoqo di mşaynutho athronoyto mqabıl da hçome dıksaymo Turkiya bu athro şbobo Libya.