Ğalabe athrawotho urifoye mahwelın uhfoxyathe mqabıl d’Turkiya

Ahfuxye mqabıl du fusqono dmıdle u rejim dı Turkiya calu şuhlofo d’Aya Sofya l’masığdo, b’qaşyutho heş kımdawmi.

 Baynothaye, Almanya, Austurya, u athro da İmarat Caraboye Mhayde wi cito Yawnoyto, mawdaclın d’Aya Sofya nuqazto marduthoyto u tawdithoyto ulsoytoyo la Mşihoye ula Maşılmone dıbritho.

 Ba hfuxye dkımdawmi calu şuhlofo di bethcatiqutho d’Aya Sofya l’masığdo, i wazirutho di baroyutho d’Almanya bi maqırhonutho dhula lu tboco froso makadla dıklozamwo meqım mıdmimıd u fusqonano, dhowewo droşe camu tukoso d’Unesco d’Emwotho Mhaydotho cali nuqazto makthabzabnoyto d’Aya Sofya dkıtyo bilohitho di yortutho marduthoyto tibeloyto.

İ şultonutho d’Almanya dmahwela u haşayda cali dawse dımhalqole Erdoğan, u malolo bışmıd di şultonutho Ştiven Zaybert mırleste “Aya Sofia kıtla ulsoyutho makthabzabnoyto marduthoyto u tawdithoyto rabtho ham la Mşihoye u hamıste la Maşılmone. Wu diyalog dkito bayn da tawdiyotho kıtle ulsoyutho rabtho laşanayna”.

Camgabıdathe, Austurya kıtwola u qolo qaşyo dkulle b’gawıd du Huyodo d’Urifi bi sbutho d’Aya Sofya. U waziro di baroyutho Alexander Şalenberg sımle qroyto lu Huyodo d’Urifi dımşahlıf i siyase dkımmaşela laf Anqara, u mırle “u şuhlofo d’Aya Sofya balhude halıqto hathtoyo bi şişaltho da tecjize dıksaymolın Turkiya. U qedomo d’Anqara bi sbutho du kriz d’Libya wu kroxayda calu ğaz ba maye d’Qefrus kmahwe dı Turkiya laşan Urifi lıfayişo şoriko dkibe tuxlono yo”. Callathe Şalenberg sımle qroyto lu Huyodo Urifoyo dmahwe klayto qşitho mqabıl dı Turkiya, udmakle abazare du cborayda li iqartho d’Urifi.

Megabo hreno, i wazirto di mardutho udi claymutho bi şultonutho da İmarat Caraboye Mhayde Nura Alkacbi, hula i hzaytayda calu fusqono dmıdle Erdoğan bi sbutho d’Aya Sofya. Alkacbi bi maqırhonutho dıfrısla bi dafayda du Twiter mırla “Aya Sofya nuqazto makthabzabnoyto dcımra alfayo dışneyo. U şuhlofo di aykanoyuthayda xıd bethcatiqutho kobe husrono li timoyutho marduthoyto du remzo noşoyano dkıtwe aminoyith u platform du diyalog udu mahwo şqolo bayn da mdinoywotho u tawdiyotho”. Alkacbi mawdaclaste di yortutho marduthoyto kımmathlo timoyutho tibeloyto noşoyto la came, la marduwotho ula mdinoywotho mşahılfe dıbritho, uhawxa mdawamla “i mşaluthaydan dsaymina u garanti du nfoqo du moro li yortuthathe laşan dfayşo la generasyone la jilat dıbqamuthayna, bnişo dsıhdo cali ciyeşe mşawtafto ucalu şbuqyo dkito bayn da came u tawdiyotho”.