Garo Paylan mahwele hfuxyo calu zebono di cito b’Bursa

B’Turkiya i yurtutho da came mşihoye lıkmınfaqla moro u kmitahıt ido acla.

 Cito Armınoyto dkıtyo bi mditho d’Bursa d’Turkiya mahto lu zebono, wu qoyumo d’HDP Garo Paylan mahwele hfuxyo lu medano.

 U qoyumo d’Omid du Gabo Demoqratoyo da Came HDP Garo Paylan mahwele hfuxyo cali sbutho d’Cito Armınoyto bi mditho d’Bursa dmahto lu zbono calu darbo du nawlo. U qoyumo Armınoyo bu hfuxyo dmahwele mırle “duktho di haymonutho qay kibe dmizabno?” U kenşo wi şultonutho aydarbo kobın aftho leşan du medano? Caybo aclayxu…

14 bu yarhano cito Armınoyto dkıtyo bi mditho d’Bursa mahto lu zbono bi dafo du nawlo “Sahibinden.com”.  İ cito dmahto b’6 Malyune u 300 alfo lirat bi rişutho “b’Bursa cito Makthabzabnoyto dkiba dmisomo qentrun di mardutho udi amnorutho, bethcatiqotho, Otel.”

İdicoyo beyn da ışne 1910 u 1914 bi marcitho d’Bursa dkıtwo bgawa a mdinotho d’Eskişehir, Afyon u Kütahya kıtwo 118.992 Armınoye. İ citatheste kmitıftakır mu zabnawo fayişo. Bu iclan dsim leşan du zebono lo mahıt u ışmo du farsufo wu furşağnou adress di cito.

Bu iclan dmahıt kmitawmırste “i cito makthabzabnayto şafico lu statu du mulk dilonoyo. İ cito dbınyowa leşan da Armınoye dıkcayşiwo bu qlimo, bıthır mi golutho da Armınoye hawyo mulk dilonoyo. Ba 1923 sımowa cambar du tütün, bıthır simo macımlo du syomo da tırahat. İ cito bgawıd dı qliimoyo dcabır bi lohtho di yurtutho d’UNESCO, i duktho dkıtyo biya kiba dmitıstacmılo leşan du turism.”

B’Turkiya hani ışne a mulkone da qalilotho kmıkboşi u kmitahıt ido aclayye. Ba olufe citotho, dayre u bethqbure naqlat hiwi li wazirutho di tawditho naqlatste mawfıqi lu zebono.

Ha ma mmathle dciş ba zabne haroyani di cito Suryoyto d’Mor Yuhanun d’Mırde dkıtyo 1700 ışne catıqto dmahtowo lu zebono bu siqumo d’5 bu yarho d’Teşrin u qomoyo ba 2020 b’timo d’7 malyune u 250 alfo Lirat dTurkiya. İ cito Suryoyto dkıtwa msajalto bi wazirutho di Mardutho udu Turizm xıd ithutho marduthoyto, meqım 5 ışne b’timo dı 12 malyune u falge lirat mahtowa lu zbono.