GEERT WİLDERS QMIRLE A GUBOYE D’HOLLANDA

Athmıl 22 bu yarhano d’Teşrin u haroyo, simiwo a guboye gawonoye d’Hollanda u adyawma hawyo i netiçe idicto u mhalıq fuqoctho folitiqoyo bu athro. Geert Wilders dkıtyo u rişono du gabo yaminoyo tuhmonoyo d’PVV, kıtle dacbar idico ba maqırhonwotho dsımle mqabıl da nuxroye, da galwoye udi hadomutho bu Huyodo d’Urifi.

Bıthır mıd hşiwi a qole da sanduqe da guboyani magle, d’PVV mıdle 35 kursiye bu Mawtbo tahtoyo u 23.5 ba mo da qole da guboyani. U mınyonano, 2 naqlat zıttır mu mede dmıdwole ba guboye da 2021’yo. Rişone xıd Viktor Orban, Marine Le Pen mhanelın Wilders cali zoxuthathe.

Wu ucdo’ste kothe u şwolo, aydarbo gıdmıtre Wilders larwal di şultonutho hathto, cal du gabo klozamle snodo me gabe frişe leşan dqodır dımdabır. Elo Geert Wilders’ste komır; Ono hadiro’no dsamno i rişwazirutho d’Hollanda. Ahna gıdfulhina leşan Hollanda dfayşo naqla hreto la Hollandoye wu tsunami da galwoye klozım dmihadıd.

İ rişonitho du gabo liberaloyo-VVD dqayıthle 23 kursiye-Dilan Yeşilgöz dkıtyo Kurdoyto, walaw mqadamla lu gabo d’Wilders, elo m’akadla dlo kubco dımşaklo şultonutho acme. Lfuth u mede dıkmahwe, cal d’ğalabe ma gabani lo kubci dfulhi cam Wilders, gıdgorış u şekolo di şultonutho hathto du athro zabno yarixo.

Bu darğo trayono da guboyani athi u gabo da Sosyaldemoqratoye-PvdA wu gabo Yarkoqo d’GL dqayıthle 26 kursiye. Wu gabo hatho d’NSC d’Pieter Omsigt mıdle 20 kursiye u hawi bu dumyano u gabo rbicoyo rabo. Mu gabano’ste kıtwo u mraşho du camaydan İsa Kahraman dmıdle snodo makfıyono leşan dcobır elo u folitiqoro Adreas Bakır mu gabo d’PVD lo mıdle snodo makfıyono ba guboyani.