Ger Pidersen mawdacle du şekolo d’şultonutho rwihto dkımathlo a’came kulle d’Suriya, kibe dımcadır bu teqimo da tedbire dmahti calu camo d’Suriya

BRITHO – U mathlono dilonoyo d’Emwotho Mhaydotho b’Suriya Ger Pidersen, bi maqıblonutho dsımle acme athmıl u ajans da tebe d’AP, mırle “u şekolo d’şultonutho kamılto ma came mşahılfe d’Suriya ba kmo şabe dıbqamuthayna, gdımcadır dımbaynina ida da tedbire dmahtile u Macırbo gıdmitaqimi aw lo, u acmaye ste u bnoyo u hethotho du athro bıthır mu nfolo du rejim du Bacıh”. 

Pidersen bi maqıblonutho dsimo acme bı Darımsuq, mırle ste “u mede dkıtli sabro in dothe dmişakıl şultonutho hathto kamılto ha bu yarho d’Odır dıbqamuthayna, gdımcadarlan u medano bu teqimo da tedbire dmahtilın an’athrawotho du Macırbo cal Suriya bu zabno di şultonutho d’Alasad”. 

Pidersen mawdacle ste dbu knuşyo qamoyo dhawiwole camu rişono di mdabronutho dı Darımsuq Ahmad Alşarıc, mawdaclewole di şultonutho zabnoyto balhude tlotho yarhe gıdhıkmo Suriya, u hawxa mdawamle “kmıtyaqanno du mede ulsoyo dkulle latyo masro cam tlotho yarhe aw lo, elo i sbutho masırtoyo cami mdabronutho zabnoyto dgıdmafito la haye u mede dmırwola aw lo yo awkith dmıştawtıfi a’Suriye kulle lu maşıqlo folitiqoyo hatho du athro”. 

Amerika wa n’athrawotho d’Urifi hul ucdo lımmaqımlın a’tedbire dmahtilın calu athro d’Suriya. Lfuth Darımsuq, a’tedbirani kmaklın u haylo dkıtla i mdabronutho zabnoyto dmitadcır u bnoyo d’Suriya m’hatho bıthır ma 14 ışne d’qrobo. Hın ma mşale du Macırbo ste, mawdaclın dkıbci dhozın ida da hakome zabnoye d’Suriya gıdmafiti la haye a’şudoye dhuwolın bi sbutho di şultonutho kamılto udu sutoro da came qalile. 

Cali sbutho da bazare dkito bayn di mdabronutho yothoyto demoqratoyto du qlimo du garbiyo udu madınho d’Suriya wi mdabronutho dı Darımsuq, Pidersen mırle “kıtli sabro dhozeno şroyo siyasi lu darbano dkıtyo sxiro”.