GHS mawdacle du qyomo dımde bayn d’SDF wi şultonutho zabnoyto dı Darımsuq dawse msimonithoyo, elo lıkımgaşmo u nişo wa zedqe dkıtle u camo Suryoyo Othuroyo

ZALIN (QAMISHLI, Suriya – U gabo du Huyodo Suryoyo d’Suriya GHS bu buyono dıfrısle lu ray gawonoyo dıbritho, mawdacle du qyomo dımde bayn da haylawotho d’Suriya demoqratoyto wi şultonutho dı Darımsuq dawse msimonithoyo, elo lıkımgaşmo u nişo wa zedqe dkıtle u camo Suryoyo Othuroyo. 

Bu şuroyo GHS mirle:

U qyomo dımde bayn du rişono gawonoyo da haylawotho d’Suriya demoqratoyto wu rişono du athro d’Suriya, kımmathıl dawse msimonoyto lafu teqwiyo du leşono du diyalog udu fhomo bayn da Suriye, udmıkle b’fothıd da komplowiye uda fıtnat bayn da came d’Suriya, ukımmathıl ste şuroyo şariro u triso mi xasra di şultonutho d’Suriya laşan du şroyo da sebwotho kulle uda qetre dkito b’Suriya, bnişo dmımte l’benyono triso u qawyo la şutose d’Suriya kulle bi mıştawtfonutho da Suriye kulle xıd came umthoye u tawdithoye mşahılfe, udmınfıq moro la zedqaththe lfuth u nomuso esonoyo hatho d’Suriya. Bebzabno, kım’akdina i ulsoyutho dmihalıq dawsat qawye laşan a’fusqone du qyomano dfayti la haye, udmişatsi a’şutose dıkşowın lu maşıqlo folitiqoyo hatho bi mıştawtfonutho da mathlone da came d’Suriya kulle, udqathle u athro d’Suriya u snodo dıklozım laşan du bnoyo u hethothayde m’hatho, dmitadcıri a’galwoyayde kulle, udmitaqimi a’tedbire kulle dmahti cal Suriya. 

Bu buyonayde, GHS komer u qyomo lıkımgaşım u nişo wa zedqe dkıtle u camo Suryoyo Othuroyo. 

M’gabo hreno, khozina du qyomano bsiroyo, ulıkımgaşım u nişo wa zedqe du camo Suryoyo Othuroyo xıd camo şerşoyo d’Suriya dmıdla ışma mene. U medano lımafıt bu qyomano cılmıd du gabo du Huyodo Suryoyo wa şutose du camo Suryoyo mıştawtaflın bu haykılo di mdabronutho yothoyto ud’QASAD ud’MSD mu zabno di mşatsonuthaththe. 

Meqım u ucdo ste kımdawmina d’obina ağuno laşan dmotina l’Suriya hirto demoqratoyto dıkcayşi eba a’Suriye kulle, udmitahwelın a’zedqaththe kulle bu haqlo umthoyo u tawdithoyo wa zedqe di barmothoyutho calu asas di şawyutho. Ubebzabno kfılhina laşan dmitıctarıf ba zedqe du camo Suryoyo Othuroyo b’gawıd du nomuso esonoyo, udmitatım medho yarixo mu dyoşo, mu tenkiro uma rdufye dsimi calu camaydan mu zabno di mşatsonutho du athro d’Suriya, cıl mıdkıtle damğa msimonitho bu bnoyo d’Suriya ubu dawro dmıştacele bu haqlo folitiqoyo, momunoyo u kenşoyo cama n’ahunonayde kulle du athro, udhule ba n’ışne du qawmo d’Suriya debhe rabe bu nfoqo mqabıl du rejim dektator udu tukoso marıhbono dı Dacış.

Bu harayto du buyonayde, GHS tlıble ste mu camaydan dıkhoye bu athro ubi golutho dımdafıc i şkihuthayde wi hiyoyuthayde i makthabzabnoyto bu athrayde b’Suriya.  

İ surto mgawanto d’Suriya layba dkımlo ulaybe ste dmişarrıro i şalyutho dlo mi şawyutho da zedqe uda woliyotho bayn da Suriye kulle, udmotina ido bido lu bnoyo d’Suriya mhayadto u qwitho dıknıfqo moro lu camayda ula zedqe dkıtle in dhowın farsufoye awste mkanşe, mawxa ubu taro du maşıqlo makthabzabnoyo dıkşıfco ebe Suriya wa camayda kulle, ktılbina ma n’abne du camo Suryoyo kulle dkıtne bu athro ubi golutho, dsaymi i wolitho makthabzabnoyto dıknıflo aclaye laşan dımdafci i şkihuthaththe wi sbuthaththe, udımthabti a’zedqaththe wi hiyoyuthaththe i makthabzabnoyto bu athraththe b’Suriya.