17/12/2020

Gıdmisım u futoho di cito d’Mor Tuma da Suryoye Qatholiqoye bu Iraq

İ cito d’Mor Tuma da Suryoye Qatholiqoye di mditho d’Mawsal bu Iraq, bıthır mıd kamıl u hethothayda, gıdmisım 26 bu yarhano u zawho ruşmoyo du futohayda.

 Camgabıdathe, sim u futoho d’wahdo di esfireğlo bi mditho Suryoyto d’Bağdede dkıtyo u wahdo tlithoyo du sport dıkmişatıs bi daşto d’Ninwe.

 U kohno di cito d’Mor Tuma da Suryoye Qatholiqoye d’Mawsal qaşişo Biyos Caffas, bi maqırhonutho dhule, mawdacle dkamili a fulhone du hethotho di citayde dkıtyo bi şawtho d’Alsaca bu macırbo di mditho. Qaşişo Biyos mawdacleste du zawho du futoho di cito gıdmisım bu yawmo trayono du cedo du mawlodo, bi şoctho da 11 d’safrayto.

Calathe, qaşişo Biyos sımle qroyto lanabne du camaydan dkıbci dmıştawtıfi lu zawhano dhudri bu zabno mhadıdo dımbayın, u dkitoste base dgınuqli a mhaymne me Caynkawa l’Mawsal. A basani gıdnıfqi 26 bu yarhano mu wahdo d’Caynkawa Mol dkıtyo bi şawtho da 108 bi şoctho da 09 d’safrayto.

Camgabıdathe, sim u futoho d’wahdo di esfireğlo bi mditho Suryoyto d’Bağdede bi daşto d’Ninwe. Lu futoho du wahdano, mıştawtafle u qaymaqam d’Bağdede Cisam Bahnam Matti, rişone da citotho du camaydan, mathlone d’gabe u şutose du camaydan wu hiğmuno d’Ninwe Najım Aljabburi.

U wahdano dıbnela i karxutho d’Ninwe, kmıhşıw u wahdo 3’yo di esfireğlo dıkmitayb bi daşto d’Ninwe, bıthır mıd shifiwo a wahde d’Ninwe ma grube marhıbone d’Dacış. U wahdano du sport d’Bağdede ba kımo yawme dıbqamuthayna gıdsoyım baytoyutho la gude di esfireğlo, wu nişo di tarmithathe dmişawşıto i aykanoyutho du sport b’Ninwe, leşan i mşablonutho di claymutho.