Gıdmitabdın a duroşe beyn Armenya u Azerbaijan

Armenia u Azerbaijan, gıdmıştawtıfi la droşe du şlomo bu athro d’Rusya calu qetro du qlimo d’Nagorno Qarabax.

 Kremlin mawdacla, cali zminutho dımqadamle u rişono d’Rusya Vlademir Putin, amathlone d’Armenia u Azerbaijan maqbelın dhudri bi ytawto b’Mosko leşan dmitabde droşe, dmitakle u qrobo b’Qarabax.

Bi maqırhonutho dhuwla i malılto di wazirutho di baroyutho d’Rusya Maria Zaxarova lu ajans d’AFP mawdacla, d’Baku u Yerevan makadlın dgımıştawtıfi la droşe dgımisomi bi mescoyutho d’Rusya bi arişkoyto d’Mosko. Ba droşaniste, gıdmıkle dilonoyith cala mkone, dmitaklın a taxtuşe beyn da hayle d’Armenia u d’Azerbaijan calu qlimo d’Nagorno-Qarabax.

Zaxarova adyawma makadlaste da droşani gıdmitabdın beyn da 2 athrawotho şbobe, cali qroyto dsımle u rişono Rusoyo Vlademir Putin u calathe mabdın ucdo a hedriyat da ytawyothani dıkmıntır dmisomi adyawma beyn da wazire di baroyutho d’Armenia u Azerbaijan. İ qroytathe d’Putin simo, bıthır mıd mahwe dlayto niye dmitaklın a taxtuşani dkımdawmi hani 2 şabe u dımkalaflın a haye dıba mowat dıbnaynoşo ma 2 gabe.

İ mdabronutho d’Kremlin mırla; U rişono Putin sımle i qroytathe leşan dmitaklın a taxtuşe b’Qarabax cali arcutho noşoyto bnişo dı qudri a 2 gabe dımşahlıfi aşlade da mithathe u da yasirathe. U waziro di baroyutho d’Azerbaijan kmıntır dloqeste a mathlone d’Fransa u Rusya u d’Amerika dıkmşakli u Ğrob d’Minsk dheş ma 1990 kımnase dmakle u qrobano dcala Qarabax.

Elo Armenia athmıl, thımla Azerbaijan bu mhoyo dıhdo ma citothayda a makthababnoyto b’Qarabax dıhzela husrono rabo bu hjomano wu mınyono d’gelyunore mjarhi. A wazire du sutoro da 2 athrawothoste mawdaclın da taxtuşe heş kımdawım u mınyono celoyo dfolhe qtili. Bu qrobano qtil hol 300 bnaynoşo uhol 140 alfo hrene mgalwelın ma botathe i sagiyoyuthathe neşe u tloye.