Gmihathıtho i cayno d’Beth Zabday

İ cayno makthabzabnoyto da maye d’Azex, kmihathıtho.

 İ caynathe dıkmıqroyo bu eşmo d’Timurleng, hawyo u remzo d’Beth Zabday. Elo a comure hazxoye, kıbci u eşmano dmişahlıf cal dlıkhozınle layıq l’Beth Zabday.

 Man abne d’Hazax Lahdo Sağ, bmimartho dıkthuwle, sımle qrayto dmicawın u bnoyo di caynathe wıdmişahlıf eşma.

Hani zabno mşarele u hethoto di cayno d’Beth Zabday d’Hazax leşan dmitadcıro lu şubheyda u qamoyo. Bu inisiyatif dmabdewole Lahdo Sağ dkıtyo man abne d’Bethzabday, tlıbwole camgabe du wahdo d’BethZabday dmihathıtho i cayno da mayeydastene cal dhani zabno naşifo.

Bıthır me dialog umahwo-şqolo dhawi camu kaymakam d’Beth Zabday Zafer Sağ, bde bi tarmitho du hethotho di caynathe. Bi mimartho dıkthuwle Lahdo Sağ cali sbuthathe li dafo du nawlo d’İdil Haber, kmawdıc; “İ caynathe da Suryoye yowa Suryoye macımrolın. Kiba i mardutho wi sınca da Suryoye. İ caynathe dhawyowa bzabno nuqazto dultomo lıhdode, a mayeyda naşifi. Ucdo bıthır man esore dhawilan camu kaymakam hatho d’Beth Zabday Zafer Sağ, mabdele u cwodo wu fulhono leşan dmitandıfo udocır haye ela. Huwestene cal dkodıc i qime da timoytho makthabzbanoye, kqodır dfohamlan bi sbuthathe.”

Elo bi mimartheyde Lahdo Sağ ktolıb u eşmo di caynostene dmişahlıf. Mu sabab i caynathe dıkmıqroyo Timurlenk, latla asirutho lo camu maktabzbno d’Beth Zabday d’Hazax ulostene camu makthzabno du camo Suryoyo. Mu sabab kımşayıl bi mimartheyde, farsufo xıd Timurlenk dsımle haqqa qtolcame u Sayfe, udıshıfle haqqa dayre u citotho, qayo a Suryoye dmahti eşme cal cayno da maye.”

A Hazxoye kıbci dmişahlıf eşma wıdmitahıt ya Cayno d’Mor Aday uyastene i cayno d’Beth Zabday. Camgabıdathe Lahdo Sağ kmawdıcstene, leşan u hethotho di caynathe da maye kımqadım 1000 Euro mcadronutho. U ha drohım uquyomo wu hethotho di duktheyde uda syome makthabzabnoyeyde, klozım dhowe mcawnono momunoyith leşan a dawsatani dıkmihalqi.