Gmitayıb taglitho mqabıl d’Morrison cal dılo mawdele bu Sayfo

U camaydan, an Armınoye wa Yawnoye dıkhoyın b’Australia, mawdaclın ilo thnihuthathe calu rişwazire du athro Skott Morrison, lo mawdele bu qtolğenso dsim aclaye ban 1915.

 Calathe a 3 camani dıkhoyın ba mdinotho d’Sidney u d’Melbourne d’Australia, gıdmtaybi taglitho mqabıl du rişwazire. Bebzabno Baroness Carolayn Koks d’Britania, tlıbla mi şultonutho dmawdıyo bu qtolğenso dan Armınoye.

U rişwazire d’Australia Scott Morrison, lo mawdele athmıl bu Sayfo dsımla imamlaxtho da Cuthmanoye calu camaydan u Suryoyo Othuroyo udu camo Armınoyo u Yawonoyo ban 1915, bu mamlo dsımle athmıl bi cohnutho da 106 eşne du qtolğensano. Calathe adyawma, gıdmtaybi a 3 camani tagliyotho ba mdinotho d’Sidney u d’Melbourne leşan dtulbi kinutho la dıbhe du qtolğenso.

Ba luhyotho dsimi leşan a tagliyothani kthiw; Mıjğıl Scott Morrison! U rişwazire heş ba 2011 mırwole bu parlamento du athro; Klozım dmawdena bu qtolğenso dan 1915. Elo ucdo dkıtyo rişwazire du athro-rfıdle a qroyotho kulle dsimi mu camaydan, man Armınoye u Yawnoye-u acmaye’ste şutose frişe, a qoyume u folitiqore hrene du athro dtlıbwolın mene dmawde bu qtolğensano.

Australia masırto’yo b’Britania-u heş athrano’ste lo mawdele bu Sayfo dan 1915, walaw simm ğalabe qroyotho li şultonutho du rişwazire Boris Johnson. Ucdo’ste i hadımto bu Bayto da Lord d’Britania-Baroness Caroline Cox tlıble me Britania dmawdıyo bu qtolğensano u mırle; Kıminakfono, cal d’Britania heş lo mawdela bu qtolğeno dan Armınoye.

İ Baroness Cox sımla mamlo bi cohnutho da 106 eşne du qtolğenso dan 1915 u mathkarla a Sohde u mırla; Hatatu u bahro, dkull falqo catumo di brithathe! İ Baroness mawdacla’ste u hfuxyayda lu kenşo Emwothoyo dkobe aftho l’Turkiya d’dayşo a zedqe noşoye u dsaymo hawbe u calathe klozım Britania dlobo tawize ma timoyothayda u dmawdıyo bu qtolğensano dan Armınoye.