Griş u zuhoro calu qento du qrobo hatho dkibe dhowe b’Lebnon
U Enstitut İsarloyo du Yulfono di Mşaynutho Athronoyto, grışle u zuhoro calu qento du qrobo hatho dkibe dnofıq b’Lebnon wu tathir dgıtore calu qlimo.
U mdabrono du Enstitutano-rabhaylawotho Udi Dekel mawdacle, da thume d’İsroyel’ste kibın dmimodi nişo lban alfayo d’soruhe dgımımhoyi me Lebnon, Suriya, umu macırbo du Cıraq u hatta me Ğazza.
Bu fuşoqo ubu nuholo dsımle u mdabrono du Enstitut İsarloyo du Yulfono di Mşaynutho Athronoyto-rabhaylawotho Udi Dekel l’dafo İsarloyto mawdacle, dkito qento dhowe qrobo bu gbino du garbyo du qlimo dgımıştawtıfile l’gabe u athrawotho frişe. Wu qrobano’ste, gıdm’athır ğalabe yaquro cali aykanoyutho gawoyto d’İsroyel.
Dekel mırle bu taşrorayde dfris b’Hebrew Channel 12; A gbine d’İsroyel gıdmimodi nişo lhçome dgımisomi me ban alfayo d’soruhe u hçome d’tayosyotho dlo pilote. A hçomani’ste gıdmisomi me Lebnon, Suriya, mu macırbo du Cıraq u hatta kito mkono dmımhın me Ğazza ma hayle d’Hamas uma hayle Maşılmone du jihad. A taxtuşe dgıdowın bu dactith-gıdmitaybi mqabıl da gbine/da thume du İran-dilonoyith bu darbo da soruhe, da tayosyotho dlo pilote
Wu ba hayle du gerilla kibın dcubri la dukotho da Fleştoye ubı dukotho ulsoye dkıtne qariwe la thume dcam Lebnon wa turone d’Golan. U mşalo İsarloyo mawdacle, dkito’ste şuhlofo hreno rabo bu gzomano, dkıtyo mu tukoso d’Hizballah dkibe bi methcadronutho du İran, dmıstacmıl soruhe dıkmohın baroyo bu nişo. Mbahnonitho İsarloyto mırla; U qrobo dgıdowe bu garbyo du athro, gıdhowe ğalabe qaşyo ulo ha ma 2 gabani kobıc dnofıq hawxa qrobo.
A gabani balki ucdo lıkubci qrobo, elo naqla hreto kibe dnofıq taxtuşe dgımişawşıti u bıthır dnfuqi mu kontroll me celtho frişe-xıd mathlo u qatloo du yadıcthono İranoyo. İran kımkarır, dgımaqwe ruhe leşan dhowe hadiro lqrobo bu garbyo. Walaw u Enstitut kınotır dmitahwe husrono rabo b’İsroyel, elo u husrono rabo kulle gıdhowe b’Lebnon u b’Suriya.