Ancient gate old-Assyrian town of Ashur UNESCO world heritage site, Iraq-RHPLF20480
20/02/2025

Ğrob d’arkeolog me Almanya umu Cıraq, mşarelın hfaryotho bi mdito catıqto d’Aşur bnişo dmaglın cal mawdconwotho hathe cali mamlaxtho dan Othuroye

İ daira dan athare udi yortutho du Cıraq mawdacla, dmabdın a hfaryotho bi mdito catıqto d’Aşur, dkıtyo bi lohitho du tukoso d’UNESCO. Ğrob d’arkeolog me Almanya umu Cıraq, mşarelın a fulhonani bnişo dmaglın cal mawdconwotho hathe cala dukothani di mamlaxtho dan Othuroye.

20/02/2025

SALAHADDIN, Ciraq – Athmıl i daira dan athare d’Salahaddin du Cıraq maglela, d’ğrob rabo d’arkeolog Almanoye u Cıraqoye, mabdelın a fulhonathe bi mdito catıqto u makthabzabnoyto d’Aşur-dkıtyo bi lohitho du tukoso di yortutho Emwothoyto-d’UNESCO.

U mşalo di daira Cali Ahmad Cabdul Latif mawdacle lu tbocofroso Cıraqoyo, du ğrobano dan arkeolog Almanoye gıdmıştace dawro ulsoyo ba hfaryotho dgısoyım leşan dmiqafe athare u tahwiyotho hathe cali mditathe i Othuroyto.

İ mditathe d’Aşur kıfayşo bu garbyo d’Bethnahrin-bu macırbo du sforyamo du nahro d’Deqlath. İ mdito bınyo’wa meqım 3000 eşne u mşaklo’wa xtuto ulsoyo beyn du İran u Anatolia bu haqlo di tagorutho. Bıthır mıd i mdito yarıwo, hawyo zabno arişkoyto di mamlaxtho dan Othuroye beyn du doro dan 14 uda 9 meqım me Mşihoyo.

U malko Othuroyo Ashurnasirpal II, nqiwole bıthır i arişkoyto li mdito d’Nemrud elo i mdito d’Ashur-dkıtyo ışmo d’aloho rişoyo du mytoloji dan Othuroye, fayişo xıd qentrun tawdithoyo ubebzabno, xıd duktho du cufoyo da alohe uda malke.

A fulhone qamoye dcal Ashur mşarewolın ma arkeolog Almanoye ban 1898. I mditathe mahtowa bi lohitho d’UNESCO ba 2003 elo ba 2015, hzewola husrono rabo mu tukoso marhıbono d’Dacış dımfarqıcowale.