Guteres sımle Qroyto l’Lebnon dıgırşo u zayno du gabo d’Hizballa

U notarrozo gawonoyo d’Emwotho Mhaydotho Antonio Guteres sımle qroyto l’Lebnon dımdawım bi tahrazto da şuhlofe momunoye, u dgorış u zayno du gabo d’Hizballa. Be bzabno, Guteres bu mamlo dsımle makadle du gabo d’Hizballa klozım dmişahlıf l’gabo folitiqoyo mdinoyo.

U mawtbo di mşaynutho d’Emwotho Mhaydotho, bi ytawto sxırto dsımle la hadomayde bu darbo du vidyo konferans, drışle u taşroro falgıdşatonoyo dcalu fusqono da na’1559 di şato da 2004 dıktolıb ma haylawotho nuxroye kulle dnıfqi m’Lebnon, udmimıd kul şıkıl d’zayno dkıtyo bidothıd da grube mzayne, ubalhude dmitasır camu gayso Lebnonoyo.

Guteres bu mamlo dsımle bu knuşyano, mşajacle i şultonutho wu gayso d’Lebnon dmaydi a’tedbire dıklızmi kulle, bnişo dlımitahwe aftho lu gabo d’Hizballa ula grube hrene mzayne dlımawdacle ışmaye, d’qathlın zayno aw dbonın haylo folhoyo frişo mi şultonutho du athro. Guteres grışleste u zuhoro cali mıştawtfonutho d’Hizballa bu qrobo d’Suriya ubı qrobe hrene dlımathkırile, ube bzabno mahwele ilothnihuthayde mu tathir dgıdhowele u medano, cal dıkmasır Lebnon cama qrobe dkowın bu qlimo du madınho mescoyo.

Camgabıdathe, Guteres makadle dıklozım u gabo d’Hizballa dmişahlıf l’gabo siyasi mdinoyo, udmıgrış mene u zayno lfuth a’fusqone du qyomo d’Altayef dmaklewole u qrobo gawoyo d’Lebnon, u lfuth u fusqono emwothoyo da na’1559, bnişo dlowe qrobo hatho bayn da Lebnonoye u dmitaqwın a’şutose di şultonutho.

Me gabo hreno, u notarrozo gawonoyo d’Emwotho Mhaydotho sımle qroyto dmitaqwe u haylo du gayso d’Lebnon, cal dkıtyo u haylo mzayno ruşmoyo ihidoyo du athro lfuth u nomuso esonoyo wu qyomo d’Altayef di şato da na’1989.

Guteres tlıbleste mi şultonutho d’Lebnon dımdawmo bi tahraztayda da şuhlofe momunoye, u dobo funoyo la sniqwotho asasi du camo, ube bzabno mzahrole mu tathir dgıdhowele u kriz momunoyo cal Lebnon.