11/04/2021

Ha ma gabe d’Hollanda maslaqle isbutho du Dayroyo Aho lu parlamento u lu waziro di baroyutho du athro

Me gabo hreno ha ma gabe folitiqoye d’Hollanda, maslaqle i sbutho du dayroyo lu parlamento u mqadamle rmoyto lu waziro di baroyutho du athro, leşan dnoqıl i sbuthathe baroyo lu bar’amnayde u Turkoyo.

İ hadımto bu parlamento d’Hollanda mu gabo d’FvD Simone Kerşeboom mqadamla rmoyto d’şwole lu parlamento u bebzabno u gabayda’ste frısle egartho bi sbuthathe du dayroyo, bi dafayde du nawlo.

İ hadımto du gabo d’Forum voor Democratie(FvD) bu parlamento d’Hollanda Simone Kerseboom mqadamla rmoyto lu parlamento calu bethdino ucalu hkomo du dayroyo di cito Suryoyto Orthodoksoyto Aho Sefer Bileçen. Bi rmoytathe dımqadmo, i qoyumto kımahkıyo du dayroyo hkim adşabtho me bethdino Turkoyo l’2 eşne u yarho hbuşyo ma thome du snodo da marhıbone. Kerseboom grışla u zuhoro calu ruğzo d’xlıqla i sbuthathe du dayroyo beyn du camaydan uda şutose u tukosayde u aydarbo ucdo u şwolano maslıq lu parlamento d’Hollanda.

U gabo d’FvD bi dafayde kımawdıc u ğamo rabo dıktocın cali yortutho marduthoyto catıqto da Suryoye dıkmivayco mcal fothe du hboso dkito aclaye b’Turkiya u gawonoyith bu Madınho Mescoyo. Mahke cali dayro d’Mor Yahkub d’Qarno dkıtyo b’duktho csitho bu Turo d’İzlo-d’ğalabe naqlat hawyo wahdo da taxtuşe beyn da hayle Turkoye udu gerilla di PKK-dıkmifaşıqi me Ankara xıd tukoso marhıbono. Wu camo Suryoyo’ste kıfoyış bu falgo da 2 haylani.

Bi rmoytathe mahke d’2 farsufe dlatwa i hiyoyuthathe idıcto dazzın li dayro meqım 2 eşne u tlıbwolın muklo. U dayroyo dkıtyo farsufo di tawditho huwlelın maye u muklo u nafıq li holo, da 2 farsufani Mharbone di PKK’wın. Elo u tehwiyo da maye udu muklo la 2 farsufani’ste mkalafla timo calu dayroyo u baroyo thim mu mqımdino Turkoyo bu snodo di PKK. Lfuth u bethdino dsim’ste, hkim bıthır u dayroyo l’2 eşne u yarho hbuşyo. Calathe i qoyumto kımşaylo; 1 Şamicitu a tebe dcalu dayroyo Suryoyo dhkim b’Turkiya cal dhuwle muklo l’2 Kurdoye?

2 Hadirehatu d’dorşitu i sbuthathe camu bar’amnayde u Turkoyo u dsaymıt u mede dıkothe menox kule, leşan dmitaqım u fusqonano dmid calu dayroyo. Wu en lathatu hadire dsaymitu u medano-Qay labxu? Mın tedbire hrene kıbxu dmayditu leşan dmitarfe u dayroyo?

3 Kımawdetu di aykanoyutho da Mşihoye b’Turkiya, dkull kothe kıhurwo?

4 Mın gıdsaymitu leşan dmicadlo i aykanoytho da Mşihoye bu Madınho Mescoyo u dilonoyith b’Turkiya?

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…