Haaiko Maas sımle socurutho l’Turkiya u lu Yawnan

İ sbutho du kroxo du nafto u du gaz  bu yamo mıscoyo mamtela Turkiya wu Yawnan lı darğo dı qrobo metul dkul yawmo ksaymi maqırhonwotho u tahdide mqabıl dıhdode, u be bzabno atre tarafe manhatlın a sfinothathe du qrobo lu yamo mqabıl dıhdode. Me gabo hreno u waziro di baroyutho d’Almanya Haiko Maas sımle socurutho latre athrawotho laşan manhıt u tansyon di sbuthathe.

Mu yawmo qamoyo dımşarele u qetrano bayn Turkiya u lu Yawnan u Huyodo d’Urifi u dilonoyith Almanya u Fransa ba maqırhonwotho dsımwolın bu darğo da rişone maqrahwolın dıgımcawni u Yawnan dkıtyo athro du huyodo d’Urifi en dhowe qrobo bayn Turkiya u lu Yawnan.

İ sbuthathe ucdo matyo du athro du Yawnan u Turkiya manhatlın asfinothathe lu yamo u mahtilin bu darğo du qento du qrobo.

Bıthır mathe u waziro di baroyutho d’Almanya Haiko Maas mabdele socurutho latre athrawotho laşan dmamte i aykanoyutho lı darğo dı droşo mıhlıf qrobo.

Bi socurutho dsımle Haiko Mas lu yawnan u yatu camu waziro di baroyutho du Yawnan Nikos Dandias u drışle i sbutho dkito bayn ale u l’Turkiya u mahwele naqa hreto i awyutho du Huyodo d’Urifi dkıtyo camu athrathe en dhowe qrobo bayn ale u l’Turkiya.

Bıthır mi socuruthatha fayıt l’Turkiya u yatu camu baramneyda Mevlut Cavuşoğlu u drışle i sbutho  di mwatyutho dkito bayn Turkiya u lu Yawnan u bu mamlo dhawilın cam hdode lu tboco froso Maas mırle naqa hreto ahna gımdawmina i awyutho dkıtlan camu Yawnan elo kıbcina di sbuthathe dmışroyo bu diyalog dhowe bayn latre athrawotho.