Haftar mbayanle a şartat dhowe şalyuthzeyno cami şultonutho d’Alsarraj

U gayso athronoyo d’Libya bi rişonutho d’Xalifa Haftar, bayn da şartat dımbaynile laşan dhowe şlayuthzayno cami şultonutho d’Fayez Alsarraj, tlıble dmışrın anuqazyotho folhoye dı Turkiya u dgurşo ahaylawothayda me Libya.

 Camgabıdathe, atagılyotho du protesto mqabıl di şultonutho d’Alwifaq kımdawmi bi mditho dı Trablos b’Libya, wa mtagılyone ktılbi dmitadre Alsarraj mi wolithayde.

 U froshezwo d’Alcarabiye bi mawdconutho dmıdle mhın mabuce b’gawe d’Libya, makadle du gayso athronoyo d’Libya dkımrayşanle rabhaylawotho Xalifa Haftar mbayanle kımo şartat laşan dmisım şalyuthzayno cami şultonutho d’Alwifaq dkımrayşanla Fayez Alsarraj.

Mbayn da şartatani dımbayni, u gayso athronoyo d’Haftar tlıble dmışrın anuqazyotho folhoye dı Turkiya, u dgurşo ahaylawothayda m’Libya. ubebzabno u gayso tlıble dmitagıldi aqyome dımdın bayn Turkiya wi şultonutho d’Fayez Alsarraj.

Haftar tlıbleste dmibayın tahrazto du zabno du groşo da mşawrone folhoye Turkiya m’Libya, udmibayınste tahrazto hreto du groşo da grube mzayne ma thume di mditho d’Sırt ud’Aljafra, udhowe u medano bu duyoqo d’Emwotho Mhaydotho.

Camgabıdathe, u gayso d’Haftar tlıble dmiamın u di fnitho du nafto dılo mi mıştawtfonutho di şultonutho d’Fayez Alsarraj.

Me gabo hreno, hani da 3 yawmeyo dkımdawmi atagılyotho du protesto bi mditho dı Tarablos mqabıl di şultonutho d’Fayız Alsarraj xıd hfuxyo mqabıl di aykanoyutho haruto di ciyeşe u di mşablonutho da maye u du kahrobo, wa mtagılyone kımtalbi dmitadre Alsarraj mi wolithayde u dmınfıq mqabıl du fasad.

Lfuth u buyono dıfrısle u zawco d’23 d’Ob, amtagılyone dı Tarablos hulın muhle d’24 şoce lu mawtbo di rişonutho di şultonutho d’Alwifaq u lu mawtbo du athro, laşan dmawdıci isticfathe xıd iqoro lu sebyono du camo.