Hamas maqbela qyomo di şalyuthzayno, Isroyel rfidla

ISROYEL / GAZA – Mşalo Fleştoyo dkıtyo qariwo mu zawco d’Hamas, bi maqırhonutho dhule athmıl l’Reuters mawdacle du zawco maqbele u renyo dhule u mathlono dilonoyo d’Amerika Stev Witkov bi sbutho du tekliyo du qrobo b’Ğaza. U mabuco Fleştoyo mawdacle ste da n’athrawotho mescoye mqadamlın ba kmo yawme haroyani renyo hatho bnişo dmımte l’qyomo di şalyuthzayno.

Lfuth u renyo dımqadım, u mabuco Fleştoyo mathkarle d’Hamas gıdmrafiyo cal tarte naqlat 10 yasire İsarloye dkıtne ba haye, mqabıl d’şalyuthzayno l’zabno d’70 yawme, udmıgrış u gayso d’İsroyel hedi hedi mhın dukotho bu qlimo d’Ğaza, udmitarfe menyono ma yasire u hbişoye Fleştoye, baynothaye ba mowat dhew elaye hbuşyo aminoyo yaste hbuşyo l’ışne yarixe.

Lfuth u mabuco Fleştoyo, gıdmitabde ste bazare lo baroye cal şalyuthzayno l’zabno yarixo ucala şartatayda, ugıdmitahwe mkono li sictho şritho du snodo kenşoyo dhiya dımdabro u qlimo d’Ğaza.

Mxasra hreto, i şultonutho d’İsroyel mıdla athmıl fusqono d’gurşo zıd m’400 alfo folhe du yedek laşan dmıştawtıfi lu gayso. Wu fusqonano kmıhşu u fusqono rabo dkulle dıkmimıd bu makthabzabno d’İsroyel bi xasra folhoyto.

I şultonutho dı Tel Aviv ste m’ayadla u fusqono dmıtlıb m’hedor d’450 alfo folhe du yedek dmıştawtıfi lu gayso lfuth muhle dgıdtaymo bu siqumo d’31 bu yarho d’Ob dıbqamuthayna.