15/03/2020

Hani 9 ışne kımdawım uqrobo bgawed d’Suriya

U qrobo gawoyo d’Suriya kımdawım hani 9 eşne, bu zabnano du gayso du rejim du rişathro Başar al Asad, kımdawım a cuqobayde calu qlimo d’İdlıb, bnişo dmandafle ma hayle di saqıbloyutho uma ğrobe marhıbone.

 Bu zabno da 9 eşnani dı şafici bu qrobano, dhawi celtho lu qatlo dba mo alfayo  bnaynoşoste, fayış al Asad bi rişonutho du athro. 

Adyawma, cabır u qrobo gawoyo d’Suriya ba 10 eşnayde. U qrobano dımşarewole bu şuroyo bı tagliyotho mşayne bu zabno du Rbico Caraboyo, kımdawım adyawma bı qaşyutho beyn da hayle du rejim uda ğrobe marhıbone bu qlimo d’İdlıb ubu garbyo d’Suriyaste, kımdawım u gayso kaboşo d’Turkiya a hjomayde cala qıryawotho d’Tel Temır uğer dukotho.

Ba eşne haroyaniste bu snodo dhuwla Rusya u İran la hayle du rejim, qadır u gayso dmalım ruhe naqla hreto u dımşawşıt bı gbine frişe wa Haylawotho d’Suriya Demoqratoyto; acmaye u Mawtbo Folhoyo Suryoyo bu snodo d’Amerika udu koalisyon Emwothoyo, mandaflın dukotho frişe ma marhıbone bu garbay madınho du athro u MFS mıdle i mşalutho di mşaynutho d’Tel Temır.

Elo ba eşne haroyaniste, kımnasyo Turkiya dmaqwiyo i ithuthayda b’Suriya u markawla ruha b’İdlib ubu garbay madınho du athro. Bu yarho d’Odor da 2011, sımwo tagliyotho b’Darca mqabıl du msoko d’clayme d’rşımlın slogane cal şuro mqabıl di şultonutho. 15 bu yarho d’Odor sımwo taglitho bi şawtho catıqto d’Darımsuq u 18 bu yarho, bıdewolın a hayle du rejim dmarisi bu zayno ba mtagliyone b’Darca u qtilwolın 4 farsufe.

A tagliyotho mbarbızi’wo bu athro kule wu qatlo da mdinoye’ste mdawamwole. Bıgawe da 9 eşnani, mıstacmıl’ste bı zabno frişe zayne kimyawi mqabıl da mdinoye wa Amerika wa hayle Emwothoye, thımwolın u rejim bu isticmal d’ğaz du klor udu Sarin cala mdinoye u tlıbwo me Başar al Asad dmıstacfe mi wolithayde.

U qrobo gawoyo d’Suriya, hawi celtho lu qatlo dhol 400 alfo bnaynoşo u falge da bnaymothoye d’Suriya, jbiri dmahzımi u hol 5 milyone’ste mgalwelın lan athrawotho nuxoye. Bıgawe da 9 eşnani’ste, mtayıb maşıqle frişe b’Çenev ubı Astana u Sochi, leşan dminase dmitarkıw u şlomo b’Suriya elo holucdo, lo qadiri a droşani’ste dmanqısi u mınyono du haşo udu qatlo da bnaynoşo.

 

Check Also

U parlamento d’Australia tlıble mi şultonutho du Iraq dımşatso şultono yothoyo lu camaydan dıkhoye bi daşto d’Ninwe

U parlamento federaloyo d’Australia, bıha femo tlıble mi şultonutho du Iraq dımşatso şulto…