Hassan Diyab u 3 tlotho Wazire kmıthomi bu furqoco dhawiwo b’Beyrut

U mşalo da buqore dcalu furqoco du lmino d’Beyrut, thımle u rişwazire Hassan Diyab dmıstacfewole mi wolithayde u tlotho wazire catiqe bi dacwa du ihmal dhawiwolın bi sbuthathe.

 Bu şuroyo di şabtho dıbqamuthayna, gıdmisım buqore camu rişwazire Diyab u cama tlotho wazire dıkmıthomi bi mşalutho dcalu furqoco d’Bayrut.

 U rişono da mbaqrone dcali sbutho du furqoco d’Bayrut dayono Fadi Sawwan, thımle u rişwazire Hassan Diyab, u waziro du momuno dmeqım Cali Hasan Alxalil wa tre wazire catiqe da şuğlone Yusıf Finyanos u Ğazi Zcaytır bi dacwa dmahmewolın i sbutho du mluwo kimyawi du Amonyom dmahıtwo bu lmino d’Bayrut.

U dayono Sawwan mbayanle ste yawme dı tre dıbqamuthayna xıd siqumo laşan dmisım buqore cama tlotho mşalani bi sbutho du furqoco.

U rişwazire Hassan Diayb bu hfuxyo dmahwele calu thomano mırle; U wujdanaydi thnihoyo u kıtli tuxlono bi nadifutho d’idothi wu qedomo şafyo dhawiwoli lafi sbutho du furqoco du lmino d’Beyrut. Kmıtcajabno mu hçomo dhawi lo acli xıd farsufo, elo calu darğo di rişwazirutho, ulıgıdobeno fsoso dmıhçım calu darğano mayna haylo dhowe.

Arbıco bu yarho d’Ob dşaficina bu furqoco dhawiwo bu lmino d’Beyrut, qtılwo zıd me 200 farsyfe u falqo rabo mi mdito d’Beyrut shıfwo.