Hasyo Suryoyo Ortodoksoyo komer: ba cithotho shife d’Mawsal hes lımmahıt ulo kefo. “Hul ucdo latlan u garanti kamilo dcayşina b’neshono ubı mşaynutho bi mditho d’Mawsal”

ARB’ILO / MAWSAL, Ciraq – U rişono di marcitho d’Mawsal, d’Kerxıslox udu qlimo d’Kurdistan hasyo Mor Niqodimos Dawud Matti Şaraf, bi maqıblonutho dsimo acme, mawdacle dlatwo bi mditho d’Mawsal ulo Suryoyo Ortodoksoyo dkımcadcıd bi cohnutho du cedo du mawlodo d’Mşiho, cal da citotho da Suryoye Ortodoksoye kulle shifene ulımmahıt ebaye ulo kefo, u hathe ste l’tarte celotho. Bi qamayto dkulle hasyo Mor Niqodimos mawdacle di marcithayde latla mkono dmacımro a’citotho shife, wi celtho da tarte cal di şultonutho d’Boğdod lımmahıtla hul ucdo ulo kefo b’gawıd d’cito mda citotho da Suryoye Ortodoksoye b’Mawsal.

Camgabıdathe, hasyo Mor Niqodimos mawdacle dgıdmişare ucdo bu bnoyo di cito makthabzabnoyto d’Mor Tuma dıkdocır cımra lu doro tlithoyo, bıthır mdımte l’qyomo cam mtakasto Swisroyto da n’athare bi mıştawtfonutho d’mtakasto hreto Franşoyto dgıdmaydi calruhaye u bnoyo di cito d’Mor Tuma m’hatho.

Hasyo Mor Niqodimos mırle ste “inaqla dlowe cito dımsalena eba, layban dfayşina bi dukthayo ste. Hul ucdo latlan u garanti kamilo dcayşina b’neshono ubı mşaynutho bi mditho d’Mawsal. U Mşihoyo laybe dfoyış b’duktho dlayba qonuno dıkhokım i dukthayo, udıkmastır u barnoşo, cal du Mşihoyo latle I mardutho du hçomo udu cnufyo mqabıl du hreno”.