Hasyo Warda mawdacle u cameydan latle duktho bgawıd du fusqono siyasi du Iraq

U rişono di marcitho d’Arbil di cito Kaldoyto d’Bobıl hasyo Mor Başşar Matti Warda, mawdacle du camaydan hul ucdo latle ulo duktho b’gawıd du fusqono siyasi du Iraq.

Bebzabno, hasyo Warda mawdacle da rişone folitiqoye Iraqoye klozım dımbayni diloyotho lu camaydan bgawıd du nomuso esonoyo, laşan dımdawım dfoyış bu athro da nabohothayde.

U rişono di marcitho d’Arbil di cito Kaldoyto d’Bobıl hasyo Mor Başşar Matti Warda, hule maqırhonutho li dafo d’Rodaw cali aykanoyutho du camaydan bu taro du wahdo folitiqoyo du Iraq, u mırle “a’Mşihoye latlın hzayto m’athronitho ba qentrune du myodo du fusqono siyasi. Ba 100 ışne haroyani u Iraq cayışwo ğalabe qrobe, ulayto ulo camo Iraqoyo dcayış b’mşaynutho b’gawıd du Iraq, kulle rdifi u dişi. Elo a’came qalile hzelın husrone u dyoşe rabtır, wu makthabzabno kmawlaflan da Mşihoye wa Yezidoye kul naqla hwın nişo la rdufye ula dyoşe. Ubıthır mu tedriyo du rejim catiqo, 67 citotho du camaydan mfarqıci u menyono ma kohne u hsayo qtili”.

Hasyo Warda mawdacle ste du camaydan lıkdocır lu athrayde lu Iraq, cal dlayto hul ucdo şartat towe du dcoro xda zedqe, a’gade du fulhono wi mşaynutho. Bebzabno, hasyo Warda mawdacle d’ğalabe nahire mu camaydan maqimi ma woliyothaththe mi celtho du mafhum di caşırto udu fasad, wa rişone folitiqoye Iraqoye kıbci dımbayni woliyotho l’farsufe dhowın danwo elaye, ulo xıd bnayqyomo laşanaye.

Cali sbutho du bnoyo u hethotho d’Mawsal wa citothayda laşan dmafşıti u dcoro du camaydan la botayde, u hasyo di cito Kaldoyto mırle “lfuth a’taşrore da mşale Iraqoye layto hul ucdo fulhone çıddi du bnoyo u hethotho, wu mede dımhathıth ba qıryawotho di daşto d’Ninwe bi rocyutho di cito sim lo di şultonutho. B’Ninwe shif 25 citotho, bi qadmoyuthaththe i cito di şuctho wi cito d’Altahira”. Bebzabno, hasyo Warda mawdacle d’hedor 16 alfo yaqrotho mu camaydan mgalwewolın ma hiğmınwotho mşahılfe du Ciraq lu qlimo d’Kurdistan bıthır mi şato da 2003, cali dkibe şalyutho, gade d’fulhono wa qıryawothaththe mhathıthi. Ubıthır mi şato da 2014 hawi golutho hathto lu qlimo ma qıryawotho di daşto d’Ninwe.

Camgabıdathe, hasyo Warda mawdacle da qraytotho dıksaymilın a’rişone folitiqoye du Iraq laşan a’Mşihoye dımdawmi dfayşi bu athro, balhude mamle halyene dkito sniqutho dmitafiti la haye, u mathkarle ste dıkloızm dmibayın diloyotho lu camaydan b’gawıd du nomuso esonoyo laşan dmilabıb dfoyış bu athro da n’abohothayde.

Cali mşaynutho gawoyto bi daşto d’Ninwe, hasyo Warda mawdacle dkito grube mzayne ğalabe bi hiğmonutho d’Ninwe, elo i sagiyuthaththe latne m’athrone ulıkkobın u reğşo di mşaynutho, mawxa ste u hasyo d’Arbil mahwele sabro dmibayın haylawotho gawoye dkıtyo I hiyoyuthaththe idıcto laşan dsaymi u sutoro di fnitho.

Mxasra hreto cali sbutho di socurutho dıkmıntır dsamla u papa Mor Fransis lu athro du Ciraq, hasyo Başşar Warda mırle “u tathir di socuruthathe macnawi yo, laşan domır u papa dlatatu tacye udgorış u zuhoro calu Iraq dkıtyo athro ulsoyo bu qlimo”.