Hawi furcoqo bu zabno dseymiwo dawriya ahayle d’Rusya u d’Turkiya

Bu zabno di dawriya da folhe d’Rusya udı Turkiya şafici bu garbay macırbo du qlimo d’İdlıb, sim hjomo dfurqoco aclaye.

İmşatasto da zedqe noşoye d’Suriya dıfrısla u tebano mawdacla, bu zabno du furqocano dhawi qariwo lu darbo d’M4, mjarıh mınyono ma folhe da tıre haylani.

 Lfuth u tebo dfrısla imşatasto da zedqe noşoye dkımtahqıbo u qrobo gawoyo d’Suriya me Britania, adyawma safrayto mido dawriya mşawtafto d’Rusya u d’Turkiya nişo lıhjomo dhawi aclaye bı foquctho dmahto calu darbayda bu qlimo d’İdlıb.

Mawdıc du furqocano hawi calu darbo stratejikoyo d’M4 qariwo l’Ariha bu tayımno d’İdlıb, dıkmasır Saraqıb cami mditho di Latqiye. Bu furqocanoste, mjarıh 3 folhe Rusoye u kımo folhe d’Turkiya. U furqocano, huwleste husrono la radoyotho da 2 haylani.

A mjarhe kulle, nqili li foqudutho oyaroyto d’Rusya b’Hmeimim leşan dmicalji. I dawriyatheste da 20’yo dıkmisomo mşawtıfo ma folhe d’Rusya udı Turkiya bu qlimano d’İdlıb, dkıtyo qyomo dmitaklın a taxtuşe ebe. Rusya mabdela buhono leşan dmiakdi a hayle dıktucni i mşalutho du hjomano.

Lfuth i Mşatasto, athmıl yawme dıtre sımwolın a hayle Rusoye u Turkoye dawriya hreto hedor i Hasake beyn Şerik wi Derbesiye. 9 bu yarho d’şafıcinaste sımwolın a 2 haylani dawriye hreto hedor Kobani bu garbiyo d’Suriya.