Hawi hfuxye towe cali socurutho du Papa lu athro du Iraq

I qadişutho du papa du Vatikan Mor Fransis Qadmoyo, athmıl bu huthomo du qurobo alohoyo dımrayşanle bi mditho d’Arbil, mkamele i tahrazto di socuruthayde lu Iraq.

Arişone Iraqoye dımwasaflın i socurutho du papa u dmawdaclın dkımathlo egartho noşoyto di awyutho, hın ma folitiqoyeste du camaydan tlıblın dmitahwele u camo Kaldoyo-Suryoyo-Othuroyo u zedqo du şultonutho yothoyo bu cafrayde u maktabzabnoyo bi daşto d’Ninwe.

U rişono di cito Qatholiqoyto dı britho papa Mor Fransis Qadmoyo dmabdewole hamşo bu yarhano socurutho ruşmoyto lu Iraq, adyawma safrayto dacır lu athro du Vatikan bi mditho d’Roma. Lu tewdico di qadişuthayde bu bethtawso emwothoyo d’Boğdod, kıtwo u rişqutno du Iraq Barham Saleh wi bethzawgayde cam taşdarto rabtho ma mşale u wazire di şultonutho u mathlone da tawdiyotho u da came mşahılfe du Iraq.

U papa athmıl casriye bi maqırhonutho dıfrısle bi dafayde du Twiter, makadle di cito bu Iraq heş haytoyo, u mırle “adyawma kibi d’hozeno u d’roğaşno bidi di cito bu Iraq heş ba hayeyo, u d’Yeşuc Mşiho hayoyo u kobe sabro lu camayde u mqadşo u mhaymno”. Bebzabno, Mor Fransis lıttaci i athto Iraqoyto dkımcaydo adyawma u yawmo şatonoyayda d’8 Othır. Ubi maqırhonutho dıfrısle I qadişuthayde bu Twiter mhanele a neşe du Iraq bu yawmano, u mırle “a’neşe caşine du Iraq kımdawmi dobın haye cıl ma dyoşe uma çurhe dkito b’lebaye”. Mor Fransis dımqadamle atawdiyothayde la neşe du Iraq, huleste fuqdono dmiyaqri u dmisım u sutorathe.

Ba hfuxye dmahwe cali socurutho du papa, u rişqutno du Iraq Barham Saleh mırle “mwadaclan I qadişutho d’Mor Fransis bıthır mıdfayışwo dayfo cazizo l’tlotho yawme bahure bı Boğdod, Alnajaf, Ur, Ninwe u Arbil. I socurutho du papa kımathlo egartho noşoyto rabtho di awyutho camu athraydan d’batıl hani ışne yarixe mu cnufyo uma qrobe”.

Mxasra hreto, u rişwazire du Iraq Mustafa Alkadhimi sımle qroyto dmitabde diyalog athronoyo kamilo dıksoyım u garanti di hdoyutho du athro. Alkadhimi bi maqırhonutho dıfrısle bu Twiter bıthır mdımkamele u papa i socuruthayde lu Iraq mırle “u Iraq kito b’qamuthe aftho makthabzabnoyto laşan dmadcır u dawro dkıtwole bi fnitho”.

M’gabo hreno, u qoyumo catiqo bu parlamento du Iraq Josef Sliwa bi maqıblonutho dsımle acme u froshezwo du Iraq, mahkele cala siyasat cjiqe dıkmitaşın mqabıl du camaydan u Kaldoyo-Suryoyo-Othuroyo bu Iraq, u mırle “bu zabno dmati u papa lu Iraq, kulle mşahılfi l’yawne du şlomo. İ saxluthathe lıkmanfıco. İda dkıbcina dmiqafe şroye şarire li sbutho du camaydan, klozım dmitakliyo i golutho du camaydan udmitadcır lu athro da n’abohothayde. Kolzım dhowele u camaydan şultono yothoyo bi daşto d’Ninwe, bnişo dmitawfıq qonune dilonoye dıknıfqi moro la diloyotho du camaydan di daşto”.