10/01/2023

Hawi taxtuşe qaşye bayn du rejim d’Suriya u Gibo marihbono d’Alnusra b’Holob

Nafıq liholo taxtuşe qaşye bayn da haylawotho du rejim d’Suriya udu Gbino marıhbono d’Alnusra. Ba taxtuşani d’athın luhwoyo hedor di mditho d’Holob mi xasra du macırbo, qtil u mçarıh 13 farsufe ma tre gabe.

HOLOB, Suriya – Hawi adyawma taxtuşe qaşye b’zayne yaqure bayn da haylawotho du rejim d’Suriya uda grube İranoye mxasra, wa çatawiye du Gbino marıhbono d’Alnusra dıkmısnodi m’Turkiya mxasra hreto.

İ mşatasto da zedqe noşoye d’Suriya, mawdacla da taxtuşani athın luhwoyo bi netiçe du hçomo dsımle u Gbino d’Alnusra cali qastra d’Bsartun dıknıflo hedor di mditho d’Hlob mi xasra du macırbo.

Bi netiçe da hçomani, 11 folhe du rejim d’Suriya qtili u mçarhi, u qtil ste tre çatawiye u mçarıh hrene mu Gbino d’Alnusra.

Camgabıdathe, a’haylawotho du rejim hçımlın ba topat cali mditho d’Sarmin dıknıflo hedor d’İdlıb mi xasra du madınho. Bu hçomano dsim, nafıl tloth foqucwotho cala bote da mdinoye, u foqucwotho hrene nafili cali qastra d’Kansafra hedor d’İdlıb mi xasra du taymno.

Lfuth i mşatasto da zedqe noşoye d’Suriya, i mwatyutho folhoyto qaşyo mu şuroyo di şatathe bu garbiyo d’Suriya dilonoyith ba fenyotho dkıtne hedor di mditho d’Hlob. İ mwatyuthathe qaşyo bi netiçe du dewam da hçome dıkmisomi ma grube çatawiye dıkmısnodi m’Turkiya.