HBA kımdawım bu feroqo di mcadronutho laşan asniqoye du cameydan

İ tarmitho di mcadronutho  me Lebo l’Lebo bi xasra d’Bethnahrin du Iraq matyo lu daşto d’Ninwe u la qastrat u qıryawotho du cameydan. İ sicto dıkmişaklo mu gabo d’HBA laşan u feroqo di mcadronuthathe matyo l’Bartelle, Bacşiqa, Bahzane, Karanjo u Nuhadra.

İ sictho di mcadronutho bıthır mıd mhaydarla a sale da muklone dkıtne ulsoye la yaqrotho mawblınne li qastra d’Bartelle bi qamayto, u bıthır mawblınne l’Bacşiqa, Bahzani, Karanjo u Nuhadra, ba qastratani u ba qıryawotho mfarqi a sale da mcadronwotho la yaqrotho.

Bu feroqano dsımlın a hadome du gabo du huyodo b’Bethnahrin athroyo mıstaqbli b’basimutho mu yaqrotho du cameydan u mqadamlın tawdiyotho la sayome di tarmithathe di mcadronutho dımahıt ışma me Lebo l’Lebo.

İ tarmithathe hawila mıcne rabtho bu zabnano du cameydan dıkfoyıt me maşıqlo ğalabe casqo me gabo u kewo di Corona u me gabo hreno u athro dkıtyo mharhızo.

A yaqrotho d’Matilın i mcadronuthathe mqadamlın atawdiyothathe la gabe u şutose du mawtbo umthoyo d’Bethnahrin dımtayablın i tarmithathe di mcadronuthathe bu zabnano u casqo u mıdlın kul tacbo qum caynaye u mfaraqlın i mcadronutho.