HBA krofıd u qyomo dımde bayn d’Boğdod u du qlimo d’Kurdistan

U gabo du huyodo d’Bethnahrin athroyo d’HBA, mawdacle dıkrofıd u qyomo dımde bayn di şultonutho qentrunoyto d’Boğdod wi şultonutho du qlimo d’Kurdistan cali aykanoyutho d’Şigur. HBA makadleste dkul qyomo dkıtle esore cama fenyotho dheş latne safye bu garbiyo du Iraq, klozım dhowe bu sebyono u bi awyutho da came da fenyothani.

 İ klaytathe d’HBA athyo luhwoyo bi ytawto dhawile u gabo, cam taşdarto mi rişonutho di mdabronutho yothoyto di fnitho d’Şigur.

 Taşdarto mşawtafto mi mdabronutho yothoyto demoqratoyto d’Şigur u mu gabo di hirutho u di demoqratoyutho da Yezidoye du Iraq, mıstaqbele lumıhreno bi mditho di Slemaniye taşdarto mu Gabo du Huyodo d’Bethnahrin Athroyo d’HBA bi rişonutho d’Yusıf Yacqub Matti dkıtyo u rişono du gabo.

Bi ytawtathe, atre gabe drışlın i aykanoyutho gawonoyto da fenyotho dheş latne safye bu garbiyo du Iraq, u makadlın dıkrıfdi kul şıkıl dıqyomo dlıkmoyıd lqul di cayno u sebyono da came dıkhoyın ba fenyothani. Atre gabe matınste l’awyutho dmafiti la haye menyono d’fulhone u hfitwotho mşahılfe bu taro du nfoqo mqabıl du qyomo dımde bayn d’Boğdod u Arbil cali ctidutho d’Şigur.

Bıthır mi ytawtathe, u rişono d’HBA Yusıf Matti bi maqırhonutho dhule li dafo d’Rojnews mawdacle du gabayde wa mathlone da Yezidoye matın l’awyutho dsaymi fulhone mşawtıfe, bnişo dmitahwın azedqe da came qalile du Iraq kulle. U rişono d’HBA mırleste “kul qyomo dcala fenyotho dkıtne masre camu mluo da 140 du nomuso esonoyo du Iraq, laybe dhowe qyomo ruşmoyo ida dlımisım bu sebyono da came dkıtne ba fenyothani. Ahna lıkmaqıblina hawxa qyome. Basyo dişutho. Hatheyo i egarthayde dkımarnola bşıkıl qriho: basyo dyoşo. Ahna şamcinaste dımşakıl sictho mu parlamento ya mi şultonutho du Iraq, laşan dıdırşo u mluo da 140 wa zedqe da came dıkhoyın ba fenyothani. Ahna kımina klozım di sicthathe dhowela mathlone ma came, ma qalilwotho uma gabe folitiqoye dkıtne hfite bu wahdo u dkıtne makthıwe ruşmoyith si şultonutho d’Boğdod aw si şultonutho du qlimo d’Kurdistan. Bu şıkılano kiban dmawfıqina surto şfitho laşan u yuthrono da bnaymothoye kulle uda tarte şultınwotho d’Boğdod u d’Arbil”.

Megabo hreno, u rişono zawgoyo di mdabronutho yothoyto d’Şigur b’Urifi Fikrat Dağra bi maqırhonutho dhule l’Rojnews mırle “dilonoyith drışlan camu Gabo du Huyodo d’Bethnahrin Athroyo d’HBA, u fusqono du parlamento d’Urifi di şato da 2016 bi sbutho dmitahwe la Yezidoye u la Kaldoye-Suryoye-Othuroye mdabronutho yothoyto b’Şigur u bi daşto d’Ninwe. Ahna mbayanlan adyawma xarita du darbo, u ba yawme dıbqamuthayna gıdırşinala b’şıkıl rwiho”. Bebzabno, Dağra mawdacle du qyomo bayn d’Boğdod u Arbil latyo ruşmoyo, u lımahwele iqoro lo la Yezidoye uloste la came hrene dıkhoyın bi fnitho d’Şigur.

Mxasra hreto, adyawmaste u mawtbo di mdabronutho yothoyto d’Şigur bu knuşyo şnizo dsımle, tlıble ma Yezidoye kulle dlayme ramhıl safrayto qum da qentrune da haylawotho d’Yezidxan dkıtne b’Şigur, bnişo dmitahwelın snodo, u dmınfıq mqabıl da tahrazyotho bcelıdboboye dıkmitaybi mqabıl du sebyono da comure d’Şigur.